Жанубий Атлантикада жойлашган Авлиё Елена оролида қурилган аэропорт қуриб битказилгандан бир йил ўтиб биринчи йўловчи самолётини қабул қилди, деб хабар бермоқда The Times нашри.

Аэропорт "энг бефойда аэропорт" деб аталганди. Бунга эса унинг қурилишига 285 млн фунт стерлинг (370 млн доллар) сарфлангани, бироқ унга биринчи рейс у қуриб битказилгандан бир йил ўтиб амалга оширилгани сабаб бўлган. 

Нашрнинг таъкидлашича, аэропорт қоя чеккасида жойлашган, шунинг учун унинг майдончасида кучли шамол эсиб туради ва бу қўнишларга қийинчилик туғдиради.  

Аэропорт қабул қилган илк самолёт Жанубий Африкадан 60 йўловчини олиб келди. Худди шунча йўловчига эга самолёт эса қитъага жўнатилган. 

Орол Буюк Британиянинг денгиз орти ҳудудларидан бири ҳисобланади ва унинг таркибига Меърож ороли ва Тристан-да-Кунья архипелаги киради.

Шу билан бирга оролнинг бир қисми, жумладан француз императори Наполеон Бонапарт сургунликда яшаган ва дафн қилинган ҳудуд Францияга тегишли ҳисобланади.

Орол Сувайш канали барпо этилгунча кемаларнинг Ҳинд океанига йўлида стратегик пункт ҳисобланган. 2016 йил ҳолатига кўра, оролда 4534 киши яшайди.