O‘zbekiston Respublikasi Oliy sudida BMTning Inson huquqlari bo‘yicha oliy komissari Zoyid Raad al-Husayn Oliy sud raisi Sh. Gaziyev bilan uchrashdi. Bu haqda O‘zbekiston Respublikasi Oliy sudi matbuot xizmati xabar bermoqda.
Shuningdek, shu kuni BMTning Inson huquqlari bo‘yicha oliy komissari O‘zbekiston Respublikasi adliya vaziri M. Ikromov, ichki ishlar vaziri A. Azizov va bosh prokurori I. Abdullayev bilan uchrashdi.
Muzokaralarda O‘zbekiston bilan BMTning Inson huquqlari bo‘yicha oliy komissari boshqarmalari o‘rtasidagi o‘zaro hamkorlikning bugungi holati va ayni yo‘nalishda istiqboldagi masalalar muhokama qilindi.
Tomonlar O‘zbekistonda inson huquqlari va qonuniy manfaatlarini ishonchli himoya qilish borasida mustahkam huquqiy baza yaratilganini qayd etib o‘tishdi.
Muzokaralarda, shuningdek, tomonlar inson huquq va erkinliklari himoya qilish borasida xalqaro tajribani o‘rgangan holda milliy qonun hujjatlarining roli, O‘zbekiston qonunchilik tizimiga xalqaro tamoyillarning joriy etilish holati, kelgusida qonunchilik va normativ-huquqiy baza, shuningdek, sud mexanizmlarini yanada takomillashtirish masalalariga e'tibor qaratishdi.
Uchrashuvlarda O‘zbekiston Respublikasining Inson huquqlari bo‘yicha milliy markazi direktori A. Saidov va O‘zbekiston Respublikasining Jyeneva shahridagi BMT Bo‘limi va boshqa xalqaro tashkilotlardagi doimiy vakolatxonasi maslahatchisi U. Lapasov ishtirok etdi.
