Германиянинг Volkswagen автоконцерни АҚШда ушбу марканинг экологик меъёрлар бузилиши аниқланган автомобилларига эгалик қилувчи 88,5 минг кишига 1,2 млрд доллар товон пули тўлаб беради. Бу ҳақдаги келишувни 11 май куни Сан-Франциско шаҳри округ судьяси Чарльз Брейер тасдиқлади.

Volkswagen 2009-2012 йилларда ишлаб чиқарилган, 3 литрли дизель двигателга эга автомобилларнинг дастурий таъминотидаги носозликни бартараф этиш ёки бу машиналар эгаларига 7,8 мингдан 13,9 минг долларгача товон пули тўлаб бериш мажбуриятини олганди. Худди шундай шартлар кейинроқ чиққан машиналарга ҳам тааллуқли бўлиб, уларнинг эгалари носозликни бартараф эта олмасликка компенсация сифатида 16,1 минг доллар олишлари мумкин.

"Бу келишув бизга якуний мақсад – Volkswagen алдовидан зиён кўрган истеъмолчилар манфаатларини ҳимоялашга эришишга имкон беради. Компания машиналарни тузатиши ёки атроф-муҳитни белгиланган меъёрдан кўпроқ зарарловчи машиналарни йўллардан йўқотиши керак", деб айтган автомобиллар эгалари манфаатларини билдирувчи адвокат Элизабет Кабрейзер.

Ўтган йили Volkswagen АҚШдаги экологик меъёрларни бузгани учун умумий ҳисобда 15,3 млрд доллар тўлаб беришга рози бўлганди. Концерн шунингдек ўз зиммасига экологик зиённи бартараф этиш учун 2,7 млрд доллар тўлаш ва атроф-муҳитни камроқ даражада зарарловчи автомобиллар ишлаб чиқариш учун 2 млрд доллар йўналтириш мажбуриятини олган.