Yaponiyada ta'magir virusga doir ma'lumotlar yig‘ish bo‘yicha qarorgoh tashkil etildi

Yaponiyada WanaCrypt0r 2.0 ta'magir dasturning global xuruji sabab mamlakat bosh vaziri Sindzo Abe devoni huzurida maxsus qarorgoh tashkil etildi. Bu haqda NHK telekompaniyasi xabar qilmoqda. 

Qarorgoh barcha vazirliklar bilan aloqa o‘rnatib, g‘arazli dasturiy ta'minot faolligi bilan bog‘liq xabarlarni to‘playdi. Ta'kidlanishicha, dam olish kunlari Yaponiyada virus bilan zararlanish holati 2tani tashkil etgan. Biroq, yangi ish haftasi boshlanishi bilan yangi zararlanishlar qayd etila boshlandi. Xususan, Hitachi kompaniyasining pochta serverlari virus nishoni bo‘ldi. Bu esa elektron pochtalarga yuborilgan maktublarni ochishda muammolarni keltirib chiqardi. Bundan tashqari, elektron maktublarni yuborish hamda qabul qilish izdan chiqqani aytilmoqda. Shuningdek, sharqiy Yaponiyadagi JR temir yo‘l kompaniyasi ham ushbu virusdan zararlangan. 

Yevropol ma'lumotlariga ko‘ra, WanaCrypt0r 2.0 virusidan 150 mamlakatdagi 200 mingdan ortiq foydalanuvchi aziyat chekkan. 

Avast antivirusi ishlab chiqaruvchilari WanaCrypt0r 2.0 virusidan foydalanilgan holda 57 mingta xakerlik xuruji amalga oshirilganini aytmoqda. Ta'kidlanishicha, virus, asosan, Rossiya, Ukraina va Tayvanda tarqalmoqda. "Kasperskiy Laboratoriyasi"da ma'lum qilishlaricha, 12 may kuni dunyoning 74 mamlakatida 45 ming xakerlik xuruji amalga oshirilgan.