Бутун дунё бўйлаб 200 мингдан ортиқ компьютерни зарарлаган товламачи-вирус Wanna Cry вирусини iuqerfsodp9ifjaposdfjhgosurijfaewrwergwea.com домен номини рўйхатдан ўтказиш билан тўхтатишга муваффақ бўлинди, деб ёзмоқда The Guardian нашри.

@MalvareTechBlog тахаллусли дастурчи ўзининг ҳамкасби Дариан Хасс билан вирус юқорида келтирилган манзил бўйича мурожаат қилаётганини аниқлашди ва вируснинг фаоллигини кузатиш учун бу домен номни рўйхатдан ўтказишга қарор қилишди. Аниқланишича, ушбу манзил вирусни тўхтатиш талаб қилинадиган ҳолат учун унинг кодига киритилган бўлган.

"Энди мен ўз резюмеимга тасодифан халқаро киберҳужумни тўхтатганимни ёзишим мумкин", деб ёзган дастурчи.

Шу тариқа ҳужумни тўхтатишга вақтинчалик муваффақ бўлинди, чунки хакерлар вирусдаги манзилни ўзгартиришлари билан киберҳужум давом этиши мумкин. 

12 май кечки пайт бутун дунёдан компьютерларнинг шифрловчи-дастур томондан зарарлангани ҳақида маълумотлар билдирила бошлаган. Дастур компьютердаги барча файлларни очиб бўлмайдиган қилиб шифрлаб қўйган. Хакерлар файлларни асл ҳолатига қайтариш учун биткоинларда товон пули талаб қилишган.