16:40 / 15.05.2017
30944

Qoidabuzar haydovchilar aksilreytingining Top-5 ligi e'lon qilindi

Foto: kun.uz

Toshkent shahri chorrahalariga o‘rnatilgan kameralar va radarlar tomonidan eng ko‘p qoidabuzarlikka yo‘l qo‘ygan avtomobillarning navbatdagi aksilreytingi tuzib chiqildi. Bu haqda respublika Ichki ishlar vazirligi Yo‘l harakati xavfsizligi bosh boshqarmasi matbuot xizmati Kun.uz saytiga ma'lum qildi. Qoidabuzarlar «poyga»si 2017 yil 6-13 may davriga tegishli ekani qayd etilmoqda. Bu safar unda faqat yuridik shaxslarga tegishli avtomobillar Top-5 ligi e'lon qilinmoqda. 

Demak, «reyting»da poytaxtimizning Chilonzor tumanida joylashgan «Gold Air Travel» MChJga qarashli «Malibu» rusumli, davlat raqam belgisi 01 216 WDA bo‘lgan transport vositasi haydovchisi «g‘olib» deb topildi. U o‘z boshqaruvidagi avtomashinada oz emas, ko‘p emas – jami 17 marotaba yo‘l harakati qoidalarini buzishga «jazm» etdi. Ushbu qoidabuzarliklarning 16 tasi belgilangan harakatlanish tezligi talablariga bo‘ysunmaslik, 1 tasi svetoforning taqiqlovchi ishorasida harakatlanish holatlaridir. Tabiiyki, qoidabuzarliklar uchun jarimalar miqdori ham «salmoqli» bo‘ldi – 8 million 87 ming 850 so‘m!

Foto:  guvd.uz
Foto:  guvd.uz

Ikkinchi o‘rinni Yunusobod tumanidagi «Bilol Myagkaya krovlya» korxonasiga tegishli «Lasetti» rusumli (davlat raqam belgisi 01 305 YDA) avtomashina haydovchisi «egalladi». U qoidabuzarliklari tufayli 13 marta kuzatuv kameralariga «tushgan». Jumladan, manzilga judayam oshiqqan, shekilli, 11 marta tezlikni belgilangan me'yordan oshirgan, 2 marta svetoforning taqiqlovchi ishorasiga bo‘ysunishni «xohlamagan». Umumiy jarima miqdori esa 2 million 845 ming 725 so‘mni tashkil etgan.

Foto:  guvd.uz
Foto:  guvd.uz

Toshkent shahar hokimligining Ma'muriy binolardan foydalanish direksiyasiga tegishli «Epika»  rusumli avtoulov haydovchisiga ham sovrinli o‘rin «nasib» etdi. Haydovchi davlat raqam belgisi 01 206 TVA bo‘lgan mazkur transport vositasini boshqarayotib, «bor-yo‘g‘i» 12 marotaba yo‘l harakati qoidalarini buzdi va shubhasiz videokameralar «nigohi»dan chetda qolmadi. Aytgancha, «Epika» haydovchisi svetoforning taqiqlovchi ishorasini xush ko‘rmaydiganlar xilidan, shekilli. Aks holda, chorrahalarda 7 marta «qizil»da o‘tmasdi. Uchinchi o‘rin «sohibi» endi qayd etilgan qoidabuzarliklar uchun 2 million 845 ming 725 so‘m miqdorida jarima to‘laydi.

Foto:  guvd.uz

Olmazor tumanidagi «Orange taxi» mas'uliyati cheklangan jamiyatiga qarashli «Neksiya» rusumli (davlat raqam belgisi 01 270 TTS) avtomobil haydovchisi «reyting»ning keyingi o‘rnini «band» etdi. Negaki, «ko‘rsatkichlari» yomon emas – u kuzatuv kameralari ishga tushganidan buyon 11 marta qoidabuzarliklarni sodir etgan. Yuqoridagi qoidabuzarliklar uchun jarimalar miqdori – 2 million 96 ming 850 so‘mni tashkil etdi.

Foto:  guvd.uz
Foto:  guvd.uz

Va, nihoyat, so‘nggi – beshinchi o‘rin «sohibi» bilan tanishing. Sergeli tumanida joylashgan mas'uliyati cheklangan jamiyat shaklidagi «Global Building Machinery» korxonasining «Malibu» rusumli (davlat raqam belgisi 01 077 VDA) avtomashinasi haydovchisi 9 marta kuzatuv kameralariga «suratga tushish» bilan ana shunday sharafga «muyassar» bo‘ldi. U shundan 8 marta belgilangan tezlik talablariga amal qilmagan. Bir holatda esa svetaforning qizil chirog‘ini «ko‘rmay qolgan». Unga 2 million 695 ming 950 so‘mlik jarima solingan.

Foto:  guvd.uz

 

Mavzuga oid
Top