Президентнинг Хитойга сафари якунлари. Муҳим келишувлар ва сармоялар

Ўзбекистон 16 Май 2017 19464
Фото: Синьхуа

Ўзбекистон президенти Шавкат Мирзиёевнинг Хитой Халқ Республикасига давлат ташрифи давомида умумий қиймати 23 миллиард доллардан зиёдни ташкил этган 100 дан ортиқ ҳужжатлар имзоланди.

Азим Аҳмадхўжаев, Ўзбекистон Инвестициялар бўйича давлат қўмитаси раиси:

– Ўзбекистон билан Хитой ўртасидаги ҳамкорлик изчил ривожланмоқда. Ўзаро манфаатли алоқаларни барча соҳаларда кўриш мумкин. Хитой Ўзбекистон иқтисодиётига катта миқдорда инвестиция киритаётган давлатлардан бири. Мамлакатимизда Хитой капитали иштирокидаги 700 дан зиёд компания ва корхона фаолият кўрсатмоқда. Мамлакатларимиз ўртасидаги товар айирбошлаш йил сайин ўсиб бормоқда. 2016 йил якунлари бўйича ўзаро савдо айланмаси ҳажми 4,2 миллиард долларни ташкил қилди.

Яна бир муҳим жиҳатни алоҳида таъкидлаш лозим. Одатда мамлакатга инвестиция жалб қилишда иккита муҳим кўрсаткич бўлади: кредитлар ва тўғридан-тўғри сармоялар. Президентимизнинг Хитойга давлат ташрифи давомида Хитойнинг турли банк ва компаниялари билан тўғридан-тўғри сармоя киритиш бўйича йирик келишувларга эришилди.

Пахтани чуқур қайта ишлаш, енгил саноат, қишлоқ хўжалиги ва фармацевтика соҳаларида ишлар бошлаб юборилди. Хитойнинг йирик компаниялари Ўзбекистонда дори воситалари ишлаб чиқаришга ҳам қизиқиш билдирди. Келгусида бу йўналишда ҳам янги келишувларга эришамиз.

Ҳусниддин Ҳосилов, «Ўзбекистон темир йўллари» АЖ бош менежери – бош муҳандиси:

– Темир йўл транспорти иқтисодиётнинг асосий қон томири ҳисобланади. Ўзбекистон темир йўллари трансминтақавий транспорт коридорларининг муҳим бўғини сифатида халқаро темир йўллар ташуви тизимида муносиб мавқега эга. Зеро, мамлакатимиз магистраль темир йўл тармоқлари Шарқ ва Ғарб, Жануб ва Шимолни бирлаштирадиган катта салоҳиятга эга.

Ўзбекистон ва Хитой ўртасида барча соҳалар қатори транспорт коммуникациялари йўналишидаги ҳамкорлик ҳам юксак суръатлар билан ривожланмоқда. Хитойда ишлаб чиқарилган юқори техник кўрсаткичлар ва қатор афзалликларга эга, замонавий ва юксак самарали электровозларнинг мамлакатимизга етказиб берилгани ўзаро манфаатли ҳамкорликка ёрқин мисол бўла олади.

Ўзбекистон билан Хитой ўртасида энг қисқа темир йўл тармоғини барпо этиш ўзаро иқтисодий ва транспорт соҳасидаги ҳамкорликнинг долзарб стратегик йўналишларидандир. Бу Хитойнинг Марказий ва Жанубий Осиё мамлакатларига чиқишини таъминлайди. Ангрен-Поп электрлаштирилган темир йўлининг барпо этилгани бу борадаги ҳамкорликнинг ёрқин ифодасидир. “Ўзбекистон темир йўллари” акциядорлик жамияти ва Хитойнинг China Railway Tunnel Group компанияси ҳамкорлигида бунёд этилган Қамчиқ туннели энг қисқа вақтда қуриб битказилган ана шундай лойиҳа сифатида тарихга кирди.

Президентимиз Шавкат Мирзиёевнинг Хитой Халқ Республикасига давлат ташрифи давомида «Ўзбекистон темир йўллари» АЖ билан ХХРнинг етакчи қурувчи компаниялари ўртасида самарали келишувларга эришилди. Мазкур ташриф ўзаро алоқаларни янада мустаҳкамлашда муҳим аҳамиятга эга.

Илҳом Ҳайдаров, «Ўзбекенгилсаноат» АЖ бошқаруви раиси:

– Жорий йил февраль ойида Президентимиз Шавкат Мирзиёев жойларда амалга оширилаётган бунёдкорлик ишлари билан танишиш мақсадида Қашқадарё вилоятида бўлди. Президентимиз Қашқадарё вилоятида хитойлик инвесторлар билан ҳамкорликда бунёд этилаётган енгил саноат корхонаси қурилиши билан танишиш жараёнида бу йўналишдаги ўзаро алоқаларни янада ривожлантириш бўйича муҳим кўрсатмалар берди.

Давлатимиз раҳбарининг Хитойга давлат ташрифи доирасида ушбу мамлакат енгил саноат ассоциацияси билан муҳим келишувларга эришдик. Улар 8 йирик ва истиқболли битимдан иборат. Мазкур ҳужжатлар доирасида хитойлик ҳамкорлар билан янги технопарк қуриш мўлжалланмоқда. Юқори технологиялар жорий қилинадиган лойиҳалар хомашёни чуқур қайта ишлашдан тортиб тайёр маҳсулот тайёрлашгача бўлган жараённи тўла қамраб олади. Ишлаб чиқариладиган маҳсулотларнинг катта қисми экспортга йўналтирилади.

Омон Мусаев, «Ипотека-банк» АТБ бошқаруви раиси:

– Президентимиз Шавкат Мирзиёевнинг Хитой Халқ Республикасига давлат ташрифи доирасида «Ипотека-банк» ва Хитой Давлат тараққиёт банки ўртасида кредит шартномаси имзоланди.

Давлатимиз раҳбари раҳнамолигида кичик бизнес ва хусусий тадбиркорликни янада ривожлантириш борасида амалга оширилаётган кенг кўламли ислоҳотлар ўзининг юксак самараларини бермоқда. Бу жараёнда мамлакатимиз банк-молия тизими томонидан қулай ишбилармонлик муҳитини сақлаш ва ривожлантириш юзасидан амалга оширилаётган чора-тадбирлар соҳа тараққиётида янги имкониятлар очмоқда.

Тадбиркорларнинг яқин ва ишончли ҳамкорига айланган банк тизими ишбилармонларнинг ишончини тўла қозонишни ўзининг асосий мақсади, деб билади. Айни пайтда мамлакатимиз банклари молиявий хизмат кўрсатишнинг барча соҳаларида самарали фаолият кўрсатаётгани ва банк тизимини янада ривожлантириш йўлида салмоқли натижаларга эришаётганини алоҳида қайд этиш жоиз.

Ўзбекистон банк тизими доимий равишда нуфузли халқаро рейтинг агентликларининг “барқарор” рейтинг даражасига сазовор бўлаётгани банкларимиз халқаро мезонларга мос иш олиб бораётганлигини кўрсатади. Банклар барқарорлиги уларнинг мижозлар талаблари асосида замонавий хизматлар сифати ва кўламини оширишига хизмат қилмоқда.

Президентнинг Хитойга давлат ташрифи доирасида эришилган келишувлар ўзининг юксак самараларини беради.

А.Ўрозов
ЎзА махсус мухбири

Кун янгиликлари
Фоторепортаж: Сурхондарёдаги чорак асрдан буён таъмирталаб йўл ҳақида
19:54 / 20.07.2017 19672 Ўзбекистон
Миграция агентлиги раҳбари билан суҳбат: хорижда ишлаш, тест синовлари ва ҳужжатлар билан боғлиқ масалалар
12:34 / 20.07.2017 34327 Ўзбекистон
Тадбиркорларни муваффақиятга элтувчи ноёб бизнес-форум ўтказилади
09:45 / 20.07.2017 7616 Жамият
Мавсумдаги илк Манчестер дербисида «қизиллар» устун келди
09:39 63 Спорт
Назарбоев қисқа муддатли таътилга чиқди
09:35 1194 Жаҳон
АҚШда талончилик учун қамалган собиқ машҳур спортчи афв этилди
09:31 668 Спорт
Янгийўлда 600 граммдан ортиқ марихуана олиб кетаётган шахс қўлга олинди
09:26 301 Жамият
Эксперт: сиёсий партия деган организмдаги бир бўғин ишламаяпти
Қатар араб давлатларига бироз ёнбосди
09:16 888 Жаҳон
Греция ва Туркияда кучли зилзиладан сўнг юзлаб кишилар жароҳат олди
09:05 1461 Жаҳон
Кўпроқ янгиликлар