Ўзбекистонда мобил алоқа абонентлари сони 21.4 млн нафарга етди. Бу эса ушбу соҳада бажарилиши лозим бўлган ишларга эҳтиёжни оширмоқда. Ўзбекистон ҳудудларини мобил алоқа сигналлари билан қамраб олиш мақсадида амалий чоралар кўриш давом этмоқда. Шу муносабат билан 2017 йилнинг апрел ҳолатига кўра, 18.3 мингта мобил алоқа база станциялари ўрнатилган бўлиб, йилнинг қолган даври мобайнида бу рақам 20 мингдан ошади. Халқаро Пресс-клубда ОАВ вакиллари билан учрашган Ўзбекистон Ахборот технологиялари ва коммуникацияларини ривожлантириш вазири Шерзод Шерматов шу ҳақда маълум қилди. 

Унинг сўзларига кўра, бугунги кунда асосий эътибор мобил алоқа тармоқларида ҳар қандай форматдаги (овозли, файл ва видео) маълумотларни юқори тезликда алмашиш имконини берувчи 4G стандартини ривожлантиришга қаратилмоқда. Жумладан, жорий йилда Ўзбекистонда фаолият юритувчи мобил операторлар томонидан республика ҳудудлари, туман ва шаҳар марказларида 450 та 4G мобил база станцияларини ўрнатиш режалаштирилган.