Бельгиянинг мусулмон ва яҳудий жамоалари вакиллари француз тилида сўзлашувчи Валлония вилояти ҳудудий парламентининг ислом меъёрлари бўйича чорвани сўйишни ман қилиш қароридан норози бўлмоқдалар.

"Анадолу" ахборот агентлигининг хабар беришича, Бельгия аҳолисининг 6% ини ташкил қилувчи мусулмон ва яҳудий жамоалари вакиллари, уларнинг фикрича, мамлакат аҳолисининг дин эркинлиги ҳуқуқини камситувчи ушбу қарорни бекор қилишга эришмоқчилар.   

Бельгия мусулмонлар уюшмаси бошлиғи Салоҳ Эчаллаоунинг айтишича, мусулмон жамоа вакиллари Валлония парламентини бундай қарор чиқаришдан олдин уларнинг фикрларига қулоқ тутишга бир неча бор чақиришган.

“Мен шахсан ўзим парламент спикерига ушбу масала бўйича биз билан маслаҳатлашиш ҳақидаги мактубни юборганман. Биз муросага боришга тайёр эдик, лекин парламент бизнинг фикримизга қулоқ тутмай, шошқалоқлик билан қарор қабул қилди”, деди Эчаллаоу.

Унинг сўзларича, мусулмон ва яҳудий жамоалари вакиллари ушбу муаммони Бельгия қонунларига мувофиқ ҳал этиш учун биргаликда ҳаракат қилмоқчилар. "Биринчи навбатда бу қарор бўйича Конституцион судда баҳслашмоқчимиз", деб айтди Эчаллаоуи.

Бельгия бош раввини Элберт Гигининг айтишича, Валлония парламенти қарори бу иккала жамоа вакиллари учун ҳам фожиадир. "Бу қарор демократик давлат ҳисобланган Бельгияда инсон ҳуқуқларини, жумладан дин эркинлиги ҳуқуқини бузади. Бу адолатсиз қарордир", деб таъкидлаб ўтди Гиги. 

Гининг айтишича, парламент депутатлари чорвани диний меъёрларга кўра сўйиш мусулмон ва яҳудийлар учун муҳим аҳамиятга эгалигини англамаяптилар.