«Milliard dollarlik jang». Makgregor Meyvezer bilan jang qilish bo‘yicha shartnomani imzoladi

Aralash janglar san'ati (MMA) jangchisi irlandiyalik Konor Makgregor amerikalik sobiq bokschi Floyd Meyvezer bilan jang o‘tkazish bo‘yicha kelishuvni imzoladi.

«Bunday rekord darajadagi kelishuvni imzolash men uchun sharaf. Bu tarixiy kelishuvning birinchi qismi bajarildi. Bu ishga aloqador barchani tabriklayman. Endi biz Ela Xeymon va uning bokschisi imzosini kutamiz. Yaqin kunlarda», — deya Makgregorning so‘zlarini keltirgan TheMacLife.com.

Kelishuvning moliyaviy jihatlari oshkor etilmagan. OAV bu jangni «milliard dollar uchun jang», deb atamoqda.

Floyd Meyvezer va Konor Makgregor o‘rtasida jang bo‘lib o‘tishi mumkinligi haqidagi xabarlar o‘tgan yilning noyabrida, UFC chempioni bokschilik litsenziyasini olganidan keyin paydo bo‘ldi. Irlandiyalik jangchi Meyvezer bilan jang uchun 100 million dollar ishlab olish istagini bildirgandi.

Keyinroq Mutlaq jangchilik chempionati (UFC) prezidenti Dana Uayt Meyvezer va Makgregor jangi uchun har ikki sportchiga 25 million dollardan to‘lashga tayyor ekanini ma'lum qilgan edi, biroq har ikki sportchi taklifni jiddiy qabul qilmadi. Shundan so‘ng Dana Uayt mazkur bellashuv irlandiyalik jangchining UFC bilan shartnomasi yakuniga yetsagina bo‘lib o‘tishini aytdi.

Mart oyida Meyvezer Makgregor bilan jang qilish uchun sportga qaytishga tayyorligini ma'lum qildi.