Франциянинг Ўзбекистондаги элчихонасида Тошкент Француз альянси раиси Шоазим Миноваровни Франциянинг "Хизматлари учун" миллий ордени зобити кўкрак нишони билан тақдирлаш маросими бўлиб ўтди. 

Миноваров Франция ҳукумати томонидан Франция ва Ўзбекистон ўртасидаги ҳамкорликни ривожлантириш ва мустаҳкамлаш, Ўзбекистонда француз тили ва адабиётини ўрганишга қўшган ҳиссаси учун тақдирланди. 

Франция элчиси Виолен де Вильмор Миноваровга ушбу фахрий мукофотни унинг оила аъзолари, яқинлари ва дўстлари, француз тили шайдолари кўз ўнгида топширди.

Орден одамларнинг барча соҳалардаги алоҳида хизматларини рағбатлантириш мақсадида тақдим этилади. Орден ўрнак бўлиш, истакларни бирлаштириш ва Франция шуҳратини ёйиш учун қўшилган ҳиссани муносиб тақдирлаш каби қадриятларни ўзида мужассам этади.