Сурхондарёлик Рустам Низомов ҳамда бухоролик Жамшид Топилов (исм-фамилиялар ўзгартирилган) ўзаро тил бириктириб, Зангиота туманининг Эркин маҳалласидан ижарага уй олишади ва яширин ишлаб чиқаришни йўлга қўядилар, деб ёзади “Ҳуқуқ” газетаси.

Улар турли жойлардан қоплардан кир ювиш ва болалар истеъмол қиладиган каша тайёрланадиган кукунларни олиб келиб, уларни турли машҳур ёрлиқлар остида қадоқлашади. Ачинарлиси, бу кимсалар гўдаклар истеъмол қиладиган маҳсулотни санитария-гигиена қоидалари талабларига жавоб бермайдиган шароитларда сотувга тайёрлайдилар. Яхшики, улар ниятларига ета олишмади. СВОЖЖДЛҚК департаментининг Зангиота туман бўлими ходимлари томонидан ўтказилган тадбирда Р.Низомов ва Ж.Топиловнинг қилмишлари фош этилди. Улар томонидан сотиш учун қадоқлаб қўйилган 4380 қути кир ювиш кукуни ҳамда 220 килограмм каша маҳсулоти ашёвий далил сифатида олинди.

Туман санитария-эпидемиология назорати марказининг хулосасига кўра, ушбу кимсалардан олинган маҳсулотлар истеъмолга яроқсиз эканлиги, инсон саломатлиги учун жиддий хавф туғдириши маълум бўлди.

Р.Низомов ва Ж.Топиловнинг мазкур қилмиши жиноят ишлари бўйича Зангиота туман судида кўриб чиқилиб, айбланувчиларга нисбатан тегишли жазо тайинланди.