GM Uzbekistan АЖ ўзининг Facebook саҳифасида қизиқарли маълумотни жойлаштирди. Унда Lacetti, Cobalt, Nexia ва Spark машиналарининг тезлик олиш вақтига аниқлик киритилган. 

“Сиз ўзингизга GM Uzbekistan ишлаб чиқарадиган автомобиллардан қайси бири тезроқ тезлик олади деган саволни берганмисиз? Эътиборингизга, автомобиллар ва улар 100 км/соат тезликка эришадиган вақт кўрсатилган GIF-тасвирни ҳавола этамиз”, - дейилади хабарда. 

GIF-суратдан кўриш мумкинки, тезлик олиш борасида Cobalt автомашинаси кўрсаткичлари анча яхши. У механик узатмалар қутиси (МУҚ)да 100 км/соат тезликка 11,7 сонияда, автоматик узатмалар қутиси (АУҚ)да 12,6 сонияда шу кўрсаткичга эришади. 

Бу борада янги авлод Nexia автомобили ҳам ундан қолишмайди. У МУҚда 12,2 сонияда, АУҚда 12,3 сонияда 100 км/с тезликка чиқади. Spark иккала узатмалар қутисида ҳам бир хил натижа 12,4 сонияни кўрсатган. 

Таққосланган автомобиллар орасида Lacetti энг секини эканини кўриш мумкин. Унинг белгиланган тезликка чиқиш учун сарфлайдиган вақти МУҚда 13, АУҚда 13,1 сонияни ташкил этади.

Фото: Facebook.com/gmuzbekistanofficial