Мадриднинг «Реал» клуби Испания чемпионатида ғолиб чиқса, «Малага»га ярим ҳимоячи Иско трансфери бўйича бонус сифатида 1 млн. евро тўлаб беради.

Бундай банд Исконинг 2013 йилда амалга оширилган трансферида белгилаб қўйилган. «Реал» «Малага»га ўйинчи жамоага ўтганидан сўнг беш йил давомида ютиб олинган ҳар бир Испания чемпионати учун 1 млн. евродан тўлаб беришга рози бўлган.

Эслатиб ўтамиз, «Реал» 37 турдан сўнг Примера турнир жадвалининг биринчи ўрнини эгаллаб турибди ҳамда «Барселона»ни 3 очкога ортда қолдирмоқда.

«Реал» Испания чемпионатининг сўнгги турида 21 май куни айнан «Малага» билан учрашади.

Иско жорий мавсумда ўз клуби сафида 40 та ўйин ўтказди ҳамда 11 гол киритиб, 9 та голли узатмага муаллифлик қилди.