Чорак асрлик даврда тараққиёт майдонида ўзига хос мавқега эга бўлишга улгурган Ўзбекистоннинг такрорланмас мерослари борки, унга кўпчилик ҳавас билан қарайди. Фикримиз ҳаётий ҳақиқат эканига Америка Қўшма Штатларининг Ўзбекистондаги мухтор элчиси Памела Спратлен хонимнинг Марказий Осиё гавҳари Фарғонага қилган ташрифи чоғида минг карра амин бўлдик. Элчи хонимни Марғилон ҳунармандлари, маҳаллий аҳолининг самимийлиги ўзига ром этгани бежис эмас, аслида.

Кўҳна Марғилоннинг узоқ тарихидан дарак бериб, атласу адраслари билан бутун дунё аҳлини ўзига ром этиб келаётган “Ёдгорлик” хусусий корхонасида бўлган элчи хоним миллий ҳунармандчилик намуналари билан танишди. Ҳунармандчилик санъати, хусусан, бебаҳо атлас ва адрас матолари, унинг ўлмас қадрият сифатида авлодларга мерос бўлиб келаётгани, қадрланаётгани меҳмонни бефарқ қолдирмади. Миллий матоларимизни яратувчилари билан қилинган дилдан суҳбатларда асрлар оша яшаб, истиқлол йилларида янада гуркираб бораётган миллий ҳунармандлар меҳнати улуғланди.

Бу каби тарихий анъаналарга элчи хоним “Ҳонақо” жоме масжидида ҳам гувоҳ бўлди. Мозийга хос кўринишда бунёд этилган ушбу масжид ва унда барпо этилган, кўзни қувонтирувчи улкан қандил нуфузли меҳмонни лол этди.

Памела Спратлен ташрифи чоғида ҳунармандлар марказида ҳам бўлиб, адрас матосининг тўқилиши, яратилиш жараёнини кўзда кечирди.

Элчи хоним Марғилон шаҳрида олиб борилган бунёдкорлик ишлари билан ҳам яқиндан танишди. Бу ердаги гўзал манзара, сўлим маскан, инсонлар учун яратилган имкониятлар унда катта таассурот қолдирди.

Аҳрор Зиё, Фарғона