Туркияда фавқулодда вазият тартиби барқарорлик ва хавфсизлик таъминланмагунча сақланиб қолади, деб айтди Туркия президенти Ражаб Тоййиб Эрдўған. У бу ҳақда Туркиянинг етакчи Адолат ва тараққиёт партиясининг навбатдан ташқари қурултойидаги нутқида айтиб ўтди. 

Партиянинг навбатдан ташқари қурултойи Эрдўғаннинг партия етакчиси этиб сайланиши учун чақиртирилди. Эрдўған 16 апрелда мамлакатда ўтган конституциявий референдумнинг якуний натижалари маълум қилингандан кейин партияга қайтишга қарор қилди. Эрдўған партиянинг асосчиларидан бири ҳисобланади, бироқ 2014 йил августда Туркия президенти этиб сайлангандан кейин ундан чиқиб кетган. Референдумда қабул қилинган конституциявий тузатишларга мувофиқ, президент аввал кўзда тутилгандек, ўз сиёсий партияси сафларини тарк этмаслиги мумкин.   

"Туркияда қонуний ҳокимиятни ағдаришга ҳаракат қилинди. Бунинг оқибатида 249 киши ҳалок бўлди, 2193 киши жароҳат олди. Қандай ҳуқуққа кўра фавқулодда вазият тартибини бекор қилишни талаб қилишмоқда? У Туркияда барқарорлик ва хавфсизлик таъминлангандагина бекор қилинади", деб айтган Эрдўған.   

Фавқулодда вазиятлар тартиби ўтган йил июлидаги давлат тўнтарувига уринишдан кейин 3 ойга киритилганди. Кейин у яна 3 ойдан 3 марта чўзилганди. Туркия мухолифати ва Европа Иттифоқининг бир қатор етакчилари фавқулодда вазият тартибининг узайтирилишини танқид қилишганди. Уларнинг фикрича, бу мамлакат фуқаролари ҳуқуқ ва эркинларига хавф солади.