Швейцарияда 21 май куни янги атом электростанцияларни қуришдан воз кечиш ва жадал равишда тикланувчи, экологик тоза энергия манбаларини жорий қилиш бўйича референдум бўлиб ўтмоқда. Бу чоралар ҳукумат томондан таклиф қилинган ва ўтган йил парламент томондан маъқулланган, умуммиллий референдумга қўйилган "Энергетик стратегия-2050" дастурида кўзда тутилган.

Ҳозирда Швейцариядаги 5 та АЭС мамлакатда истеъмол қилинадиган электр энергиянинг учдан бир қисмини таъминласа-да, ҳукумат уларни босқичма-босқич ёпиш кераклигини айтмоқда ҳамда гидроэлектростанциялар, шамол генераторлари, қуёш ва геотермал қурилмаларни қўллашни иқтисодий рағбатлантиришни таклиф қилмоқда.

Дастурга кўра энергия истеъмоли 2050 йилгача 2010 йилга нисбатан 2 мартага камайиши керак. Унинг мақсади мамлакатнинг хориждан сотиб олинувчи углеводородлардан тобелигини камайтириш ва энергетик хавфсизлигини таъминлашдан иборат.

Дастурга қарши чиқаётганлар янги энергия манбаларига ўтиш солиқ тўловчиларга 200 млрд франкка (деярли 200 млрд доллар) айланишини, бу эса 4 кишидан иборат оилага ҳар йили 3200 франкдан тушишини айтмоқдалар. Бундан ташқари, улар бу жараён мамлакат ўзини электр энергия билан ишончли таъминлай олмаслиги ва уни катта миқдорда импорт қилишга олиб келишидан ва демакки, мамлакатнинг бошқа давлатлардан тобелиги янада кучайишидан хавотирланмоқдалар.  

Ўтган йил ноябрдаги референдумда швейцарияликлар АЭСларни тезкорлик билан ёпиш таклифини рад этишганди. Бу ташаббусни билдирган "яшиллар" партияси барча 5 та АЭС ишини 45 йил билан чеклашни таклиф қилганди. Бироқ бу таклифга 54,2 фоиз фуқаролар қарши чиққандилар.