Британиялик таниқли актёр Хью Грант деярли 25 йилдан кейин Британия телевидениесига қайтмоқда, деб хабар бермоқда Variety нашри.

У реал воқеалар асосида суратга олинадиган "Ўта инглизча можаро" номли драмада иснодга қолган сиёсатчи ролини ижро этади. Телелойиҳа учта қисмдан иборат бўлади ва BBC One канали орқали намойиш этилади. 

Фильмга Грант аввалроқ суратга тушган "Флоренс Фостер Женкинс" фильми режиссёри Стивен Фрирз бўлади. Актёр бу сурат учун "Олтин глобус" ва BAFTA мукофотларига даъвогарлик қилганди.

Янги фильмнинг бош қаҳрамони замонавий тарихда суд олдида қотиллик учун жавоб берган биринчи британиялик сиёсатчи Жереми Торп ҳисобланади. 1979 йилда ўша вақтда Либерал партия етакчиси ва охирги 100 йил ичида британ сиёсий партиялари етакчилари орасидаги энг ёши бўлган Торп ўзининг собиқ маъшуқаси Норман Скоттни ўлдириш учун жиноий тил бириктирганликда айбланган.