Дунёдаги энг баланд тоғ Эверестнинг бир қисми 2015 йилда Непалда юз берган кучли зилзила вақтида ўпирилиб кетган. Бу маълумотни британиялик альпинист Тим Моздейл тасдиқлади.

Унинг айтишича, чўққининг жануби-шарқий томонидан баландлиги 12 метрлик вертикал қоя ажралган. Бу қисм чўққини биринчи бўлиб забт этган янги зеландиялик альпинист ва тадқиқотчи Эдмунд Хиллари шарафига "Хиллари зинапояси" деб аталган.

"Мен ўтган йил чўққига кўтарилгандим, бироқ биз зинапоя йўқолганига ишончимиз комил эмасди. У ерда қор ёғаётганди. Бу йил мен тоғнинг бу қисми бу ерда аниқ йўқлигини маълум қила оламан", деб айтган Моздейл Guardian нашрига берган интервьюсида.

Унинг айтишича, ўпирилиш жойи ўзгарган рельеф сабабли кўтарилиш учун хавфсиз бўлмай қолган.

"Хиллари зинапояси" 8790 метр баландликда жойлашган бўлиб, альпинистлар томондан 8848 метр баландликда жойлашган Эверест чўққисига кўтарилишдаги сўнгги тўсиқ ҳисобланарди.