Таиланд пойтахти Бангкок шаҳрида ёввойи макака-резус маймунини сайёҳлар кўп овқат бериб, ҳаддан ортиқ семиртириб юборишган.

Khao Sod хабарига кўра, Таиланд миллий қўриқхоналар ва табиатни муҳофаза қилиш вазирлиги ушбу жонивор керакли даражада озмагунича, унга фақат сабзавотлар ва мевалар бериш зарурлигини маълум қилган. Унга кунига 400 граммдан ортиқ егулик бериш мумкин эмас. Бундан ташқари, маймунни ҳар куни ҳаракатланишга мажбур қилишади.

Ҳозирда жониворнинг вазни 26 килограмм, — бу нормадагидан 3 баробар кўп. Давлат органлари ушбу маймунга унинг сурати ижтимоий тармоқларда тарқалгач, эътибор қаратди. Унга ҳаракатланишга халақит қилувчи катта қорни туфайли маҳаллий аҳоли «Семиз амаки» лақаби берилган.

Associated Press нашрида маълум қилинишича, у маймунлар галаси раҳбари бўлган. Бошқа маймунлар унга егуликлар келтириб беришган.

Макака-резус — дунёда энг кўп тарқалган маймун туридир. Бу тур Ҳиндистон шимолида, Бангладеш, Покистон, Непал, Бирма, Таиланд, Афғонистон, Вьетнам ва Хитой жанубида кенг тарқалган. Эркак макаканинг оғирлиги ўртача 8 килограмм бўлади.