Бугун Таиландда футзал бўйича тарихда илк маротаба ўтказилаётган U-20 Осиё чемпионатида чорак финал баҳслари бўлиб ўтади. Ўзбекистон U-20 терма жамоаси Мўғулистонга қарши кураш олиб боради. Учрашув Тошкент вақти билан соат 17:00да бошланади. Бу ҳақда Ўзбекистон футзал уюшмаси матбуот хизмати томонидан маълумот берилган.

Испаниялик мутахассис Хосе Мария Мендес бошчилигидаги ўзбекистонлик футзалчилар турнирнинг «C» гуруҳидан жой олганди. Ливан, Ҳонгконг, Мьянма ва Қатар термалари билан кураш олиб борган жамоа гуруҳ босқичини 10 очко билан пешқадам сифатида якунлади. Ливан билан 4:4 ҳисобида якунига етган ўйиндан ташқари, Мьянма 5:0, Ҳонгконг 8:2, Қатар 7:4 ҳисобида мағлуб этилганди.

Жами 21 мамлакат термалари бош соврин учун кураш олиб бораётган Осиё чемпионатида бугун чорак финал доирасида 4 учрашув бўлиб ўтади.

Осиё чемпионати—2017
Чорак финал
22 май, душанба

Индонезия — Таиланд
Эрон — Ливан
Ироқ — Япония
Ўзбекистон — Мўғулистон

Ўзбекистон терма жамоаси бугун зафар қуча олса, ярим финалда Ироқ — Япония жуфтлиги ғолиби билан тўқнаш келади. Финалга қадар етиб борган икки терма жамоа 2018 йил бўлиб ўтадиган ёшлар ўртасидаги Олимпиадада иштирок этади.