Испания бош вазири Мариано Рахойнинг фикрича, Каталония ҳукумати Испаниядан мустақиллик олиш ҳақида қонун лойиҳасини ишлаб чиқиб, давлат, демократия ва испанларни шантаж қилиш билан шуғулланмоқда. 

Аввалроқ El País газетаси Каталония ҳукумати махсус механизм ишлаб чиққанини хабар қилганди. У автоном ҳамжамиятнинг Испания таркибидан чиқиши жараёнида қўлланилади. “Юридик ўтиш” қонуни конституциянинг ўрнини икки ой давомида эгаллаб туради. Бу вақт давомида эса Каталония парламенти “Каталония парламентлик республикасини ташкил этиш жараёнини олиб боради”.

"Улар давлат, демократия ва испанларни шантаж қилмоқда. Биз буни қабул қилмаймиз", - дея маълум қилди Рахой El País’да эълон қилинган материалга муносабат билдириб.

Унинг сўзларига кўра, бу “бутун сиёсий фаолиятида” кўрган “энг жиддий нарсадир”.

Рахойнинг қўшимча қилишича, депутатлар конгрессида Каталония масаласини муҳокама қилиш таклифи ҳамон кучда турибди.

"Биз мулоқот дастаклари ўз кучини йўқотган, деб ҳеч қачон ҳисобламаймиз. Майли, Пучдемон (Каталония ҳукумати раиси Карлес Пучдемон – таҳ.) ўз таклифларини берсин. Эълон қилинган нарса эса – бу шантаж. Испанияда бундай нарсани анчадан бери кўришмаганди. Бу ҳуқуқий давлатни йўқ қилиш, бу қонунни йўқ қилиш, 500 йиллик миллий суверенитетни йўқ қилиш, испанларга миллий суверенитет йўқ, дейиш билан баробар. 21 асрда миллий давлатни йўқ қилишга бўлган уриниш – исталган нуқтаи назардан ақлсизликдир", - деган бош вазир.

Ўтган ҳафтада Испания ҳукумати раиси ўринбосари Сорайя Саэнс де Сантамария Каталония масаласини депутатлар конгрессида муҳокама қилиш кераклигини маълум қилди. Каталония ҳукумати раҳбари Карлес Пучдемон эса Испания ва Каталония ҳукумати референдум шартларини муҳокама қилишлари ҳамда келишувга эришишлари даркорлиги ҳақида гапирди. Агарда бу ҳолатга розилик билан жавоб қайтарилса, масалани иккита парламентга кўриб чиқиш учун топшириш мумкин. Пучдемоннинг фикрича, Сантамариянинг таклифи Испания ҳукумати референдум ўтказиш имконияти борлигини тан олишини кўрсатади.