22 май куни Қирғизистон ва Тожикистон чегараси ҳудудида 6 баллик зилзила рўй берди. Қирғизистон ФВВ маълумотига кўра, ҳодиса оқибатида ҳалокатлар рўй бергани ҳақида маълумот келиб тушмаган.

"Республика фанлар академияси қошидаги сейсмология институти маълум қилишича, Қирғизистон жанубида, Тожикистон билан чегарада маҳаллий вақт билан соат 15:23да (Тошкент вақти билан 14:23) зилзила содир бўлди", дейилган хабарда.

Сейсмологлар маълумотига кўра, зилзила кучи марказда 6 баллни ташкил этган. Бор-Добо, Қора-Киндик қишлоқлари аҳолиси 5 балли зилзила кучини сезишган, Нурда 4,5 балл, Соритошда эса 4 балли зилзила қайд этилган.

3 май куни Қирғизистон ва Тожикистон чегарасида, Душанбедан 257 км масофада (Фарғонадан 105 км, Боткентдан 70 км) 7 балли зилзила кузатилганди. Бу зилзила кучи Бишкекда, Олмаотада ва Тошкентда сезилганди. Шу куни афтершок рўй берган, ер 5,5 балли куч билан силкинганди. Шу кунги ер қимирлашлари оқибатида 520га яқин уй вайрон бўлган, яна 500га яқин бино таъмирталаб аҳволга келганди.