Трамп Исроил ва Фаластинга тинчлик келтириш мақсадида бормоқда

Жаҳон 22 Май 2017 3280
Фото: AFP

АҚШ президенти Дональд Трамп Исроил ва Фаластинга икки кунлик ташрифини бошламоқда. У икки давлат ўртасига тинчлик қилишга ваъда берар экан, ўзидан аввалги давлат раҳбарлари амалга оширолмаган ишни қандай уддалашига ойдинлик киритгани йўқ. 

Маҳаллий етакчилар, Ал Қудс ва Байтлаҳмга ташриф буюришни режалаган Америка давлат раҳбарига мавзуларга бой учрашувларни тайёрламоқда. Мазкур ташриф, аллақачон, "тарихий" деб аталаётган бўлса ҳам у амалий натижага эга бўладими-йўқми, номаълумлигича қолаяпти. 

"Мен президент Трамп билан  Қўшма Штатлар ва Исроил ўртасидаги муҳим ҳамда кучли иттифоқни янада мустаҳкамлаш йўлларини муҳокама қилмоқчиман. Биз хавфсизлик борасидаги алоқаларимизни мустаҳкамлаймиз ҳамда тинчликка эришиш йўлларини муҳокама қиламиз", — деган Исроил бош вазири Бинямин Нетаньяху.

"Ўйлайманки, битимга эришиш борасида катта имконият бор… Мен Исроил халқини севаман ва алалоқибатда исроилликлар ва фаластинликлар тинчликка эришишларини хоҳлайман. Умид қиламанки, бу ўйланганимдан ҳам тезроқ амалга ошади", — деган президент Исроилнинг "Исраэль ха-Йом" нашрига берган интервьюсида. 

Трамп, бунга қадар, Исроил ва Фаластин етакчилари Нетаньяху ҳамда Маҳмуд Аббосни Оқ уйда қабул қилишга улгурган эди. Уларнинг иккиси ҳам Американинг янги тинчлик ташаббусларини қўллаб-қувватлашга тайёрликларини билдирган эди. Бироқ, ҳозирча, уларнинг моҳияти ошкор қилингани йўқ. Шу билан бирга, исроиллик сиёсатчилар ва матбуот бу сафар ҳам янги ташаббус нимадан иборат эканига аниқлик киритилмаслигини тахмин қилмоқда. 

"Ҳозирча, бу ташриф бирор амалий натижа билан якунланиши маълум эмас", — деб ёзган Исроил мудофаа вазири Авигдор Либерман Facebook саҳифасида.

"Haaretz" газетаси, ўз навбатида, Оқ уйдаги манбаларига асосланган ҳолда ёзишича, Трампнинг ташрифидан кўзланган мақсад 2014 йилдан бери музлатилган Фаластин-Исроил музокараларини қайта бошлаш эмас. "Биз етакчиларнинг учрашуви ёки уч томонлама музокараларни бошлаш вақти келди, деб ҳисобламаймиз. Бунга ҳали эрта", — дея манба сўзларини келтиради газета. 

Нашрнинг ёзишича, Трамп бу сафарида Нетаньяху ва Аббосни "тинчлик музокараларини бошлаш учун қулай шароит яратиш мақсадида ўзаро ишончни мустаҳкамлайдиган чоралар кўришга чақириш билан чекланади". 

Саудия Арабистонидан учиб келувчи Трампни Тель-Авив халқаро аэропортида Нетаньяху ва ҳукуматнинг барча аъзолари кутиб олади. У бу ердан вертолёт ёрдамида Қуддусга йўл олади ва бу ерда Нетаньяху ҳамда Исроил президенти Реувен Ривлин билан учрашади. Ташриф дастурига кўра, насронийлик ва яҳудийлик динларининг муқаддас қадамжоларини зиёрат қилади. 

23 май куни Трамп қисқа муддатга Байтлаҳмга ташриф буюриб, бу ерда Аббос билан учрашади. 

Кўпроқ янгиликлар