Дунёдаги энг кучли ракета ҳисобланувчи Delta 4 Heavy 2023 йилда сўнгги маротаба фазога кўтарилади. Бу ҳақда АҚШ ҳарбий-ҳаво кучлари космик қўмондонлиги раҳбари генерал Жей Реймонд маълум қилди. У Конгресс вакиллари палатасининг қуролли кучлар бўйича қўмитаси йиғилишида шу ҳақда сўз юритган, деб хабар қилмоқда Space News нашри.

Ушбу йиғилишда иштирок этган АҚШ ҳарбий-космик разведка миллий бошқармаси бошлиғи Бетти Саппнинг қайд этишича, ракета айғоқчи сунъий йўлдошни фазога олиб чиқиш ва бошқа разведка мақсадларида учирилади. 

Умуман, Delta 4 Heavy олти марта Пентагон буюртмасига асосан, бир марта НАСАнинг Solar Probe Plus илмий станциясини олиб чиқиш учун учирилади. Ракетанинг енгиллаштиришган намунаси Delta 4 Medium уч марта фазога кўтарилади.

Қўмита йиғилишида қайд этилишича, АҚШда Delta 4 Heavy ўрнини босадиган ракеталар ишлаб чиқиш бўйича ишлар олиб борилмоқда. Булар биринчи галда Falcon Heavy (SpaceX компаниясининг ракета ташувчиси) ва New Glenn (Blue Origin компанияси ракетаси 2020 йилда фазога кўтарилади) ракеталаридир. 2019 йилда, шунингдек, Vulcan (аслида, Atlas 6) ракетаси учирилади. У Америкада ишлаб чиқарилган двигателлар билан жиҳозланади. Бундан аввалги Atlas 5 Россиянинг РД-180 двигателлари билан жиҳозланар эди.

Delta IV ракеталар оиласи таркибига 5та ташувчи киради. Уларнинг энг кучлиси Delta IV Heavy бўлиб, у Ерга яқин орбитага 28,8 тонна фойдали юкни олиб чиқа олади. У дунёдаги энг қиммат ракета ҳам ҳисобланади. Уни бир марта учириш 400 миллион долларга айланади. Умуман, 2004 йилдан бери Delta IV Heavy 9 марта учирилган. Уларнинг фақат биттаси қисман муваффақиятлидир. Ушбу ракетанинг барча қисмлари Американинг Aerojet Rocketdyne компанияси томонидан ишлаб чиқилган.