АҚШнинг Калифорния штатида яшовчи Грегори Аллен Жастис давлат аҳамиятига молик махфий маълумотларни сотиш бўйича ўз айбини тан олди. Бу ҳақда АҚШ Адлия вазирлиги хабар берди. 

Тергов маълумотига кўра, 2000 йилдан бери АҚШ мудофаа вазирлигида муҳандис сифатида ишлаган 49 ёшли Грегори Аллен Жастис, ўтган йилда “сунъий йўлдошлардан махфий маълумотни” ўғирлаган ва уни Россия разведкаси ходими, дея ҳисоблаган шахсга сотмоқчи бўлган. Аммо у ФҚБ агенти бўлиб чиқди.

Таъкидланишича, Жастис АҚШ ҳарбий ва тижорий сунъий йўлдошларида ўрнатилган дастурий таъминотга алоқадор махфий маълумотларни ўғирлашга муваффақ бўлган.

У ФҚБ агенти билан 2016 йилнинг февраль-июль ойлари давомида мулоқотга чиққан ва махфий суратлар учун “минглаб доллар” сўраган. Бундан ташқари, у агентга “ҳарбий мақсадга мўлжалланган фазовий қурилмалар” ишлаб чиқарувчи корхонага “экскурсия билан” боришни ҳам таклиф қилган.

2016 йилнинг июлида Жастис қўлга олинди. У суд йиғилишида ўз айбини тўла тан олди ва касал рафиқаси учун пул топмоқчи бўлганини иддао қилди. Эндиликда у 35 йилгача озодликдан маҳрум этилиши мумкин. Муҳандисга берилган аниқ жазо муддати 18 сентябрь куни эълон қилинади.