Кўп йиллардан буён Ўзбекистон Марказий банки раиси лавозимида фаолият юритиб келган Муллажонов Файзулла Мақсуджонович бугун, 23 май кунининг иккинчи ярмида 67 ёшида оламдан ўтди. Бу маълумотни Кун.uz сайтининг бир неча манбалари, хусусан Марказий банкдаги манба тасдиқлади.

Манбаларнинг билдиришича, марҳум охирги йилларда бетоб эди, унинг ўлими шу хасталик туфайли рўй берди.

Муллажонов Файзулла Мақсуджонович 1950 йилда Сирдарё вилоятида туғилганди. 1971 йилда Тошкент халқ хўжалиги институтини тамомлаган Муллажонов 1991 йилдан буён Марказий банк раиси сифатида ишлаб келаётганди.

Эслатиб ўтамиз, апрель ойида Ўзбекистон ҳукуматида энг кўп вақт бўлган яна бир давлат арбоби Бўритош Мустафоев 68 ёшида хасталик туфайли оламдан кўз юмганди.