Тошкент вилояти божхона бошқармаси ходимлари турли товар-моддий бойликларнинг божхона назоратидан яширинча олиб кирилишига доир бир нечта қонунбузарлик ҳолатларини фош қилишди, деб хабар бермоқда Тошкент вилояти божхона бошқармаси ахборот хизмати.

Жумладан, “Ғишткўприк” чегара-божхона комплексида Ўзбекистонга кириб келган енгил автомашиналардан бири божхона кўригидан ўтказилганда, унинг эшиклари орасидаги кўз илғамас бўшлиқларга 4 турдаги 1100 донадан ортиқ стоматологик техник воситалар яширилганлиги аниқланди.

Божхона ходимининг оғзаки сўров вақтида ҳамда йўловчи божхона декларациясида маълум қилинмаган ва қиймати салкам 110 млн. сўмни ташкил қилувчи ушбу тиббий воситалар фуқаро М.Бакиевга тегишли бўлиб чиқди. 

“Яллама” чегара-божхона постида эса фуқаро Т.Тўйчиев божхоначиларнинг кўзини шамғалат қилиш учун “Камаз” русумли автоулови юк хонасининг пол қисмини танлади. Полнинг остига ушбу шахс 33 турдаги 2141 дона, шунингдек 3 турдаги салкам 60 кг. биологик актив қўшимчаларни яширган ҳолда Ўзбекистонга олиб киришга уринган экан. Божхона расмийлаштируви ва сифатини тасдиқловчи ҳужжатлари бўлмаган мазкур товар-моддий бойликларнинг умумий қиймати 182 млн. сўмдан ортар экан.

Шунингдек, мазкур постда божхоначилар йирик миқдордаги яна бир божхона қоидабузарлигини фош қилишди. Тегишли ҳужжатларга кўра, мана бу “МАН” русумли юк автомашинасида пойтахтимиздаги “Inter auto line” маъсулияти чекланган жамияти номига ун маҳсулотлари келтирилаётган бўлиши керак эди.

Бироқ, божхона кўриги давомида эса божхоначилар бутунлай бошқа манзарага дуч келишди. Фуқаро Х.Холматов бошқарувидаги мазкур автомашина юкхонасида ун маҳсулоти ўрнида ноутбуклар, турли истеъмол товарлари, биологик актив қўшимча ва гиёҳлар, алкоголли ичимликлар, кийим-кечаклар, газламалар ва бошқа товар-моддий бойликлар борлиги аниқланди.

Йўл-юк кузатув ҳужжатларида қайд этилмаган ва божхона назоратидан четлаб олиб кириш пайтида тўхтатиб қолинган мазкур товар-моддий бойликларнинг умумий қиймати 923 млн. сўмдан ошар экан.

Мазкур ҳолатлар юзасидан Ўзбекистон Республикаси Жиноят Кодексининг 182-моддаси 2-қисми “а” банди билан жиноят ишлари қўзғатилиб, тергов ҳаракатлари олиб борилмоқда.