24 may kuni O‘zbekiston Respublikasi Tashqi ishlar vazirligida muntazam o‘tkazilib kelinayotgan ikki tomonlama vazirliklararo maslahatlashuvlar doirasida Avstraliya Tashqi ishlar va savdo vazirligi Janubiy va G‘arbiy Osiyo Departamenti boshlarmasi direktori Jyeyms Holl boshchiligidagi delegatsiya bilan uchrashuv bo‘lib o‘tdi. Bu haqda O‘zbekiston TIV matbuot xizmati xabar bergan.
Tashqi siyosat idoralari vakillari siyosiy, savdo-iqtisodiy, investitsion, madaniy-gumanitar va boshqa sohalardagi hamkorlikni yanada rivojlantirish istiqbollariga urg‘u bergan holda O‘zbekiston-Avstraliya kun tartibining keng doiradagi masalalarini muhokama qilishdi.
Delegatsiyalar munosabatlarning shartnomaviy-huquqiy asosini kengaytirish masalalari, jumladan tomonlar ko‘rib chiqayotgan “Investitsiyalarni rag‘batlantirish va o‘zaro himoya qilish to‘g‘risidagi” va “Turizm sohasida hamkorlik to‘g‘risidagi” hukumatlararo shartnomalar loyihalari yuzasidan ham fikr almashishdi.
Uchrashuvda Avstraliya elchisi (qarorgohi Moskva shahrida) Piter Martin Tesh ishtirok etdi.
