Туркия иқтисодиёт вазирлиги Россиядан буғдой импортига янги чекловлар қўйилгани ҳақидаги хабарларни рад этди. РИА Новости агентлиги идора баёнотини келтирган, унда Москва билан савдо чекловларини олиб ташлаш ҳақидаги келишувга риоя этилаётгани айтилади.

Аввалроқ, 24 май куни «Ведомости» газетаси Туркия Россия буғдойига қўшимча чекловлар киритгани ҳақида хабар берганди. Янги қоидаларга кўра, эндиликда Россия ҳисобига ғалла импорти учун берилган лицензияларнинг 25 фоиздан ортиғи тўғри келмаслиги керак. 

Шунингдек, Анқара Россия кунгабоқар ёғини божсиз етказиб беришга чекловлар киритгани, квота ҳажмини 15-30 фоиз даражада қолдиргани хабар қилинганди.

«Россия ва Туркия ўртасидаги сиёсий ҳамда иқтисодий муносабатларда кузатилаётган ижобий қадамларга қарамай, баъзи ОАВ Россиядан қишлоқ хўжалиги маҳсулотлари импортига чекловлар қўйилгани ҳақида маълумот бермоқда, бу ҳақиқатга тўғри келмайди. Туркия эришилган келишувларга риоя этишда давом этади», - дейилади вазирлик баёнотида.

4 май куни Туркия Россиядан буғдой импортига қўйилган чекловларни бекор қилди. Бу Россия президенти Владимир Путиннинг туркиялик ҳамкасби Ражаб Тоййиб Эрдўған билан музокараларидан сўнг юз берди. Бироқ Россияга помидорлар етказиб бериш бўйича чекловлар ҳозирча сақланиб турибди.