Бельгияда АҚШ президенти Дональд Трампнинг НАТО саммитида иштирок этиш учун Брюсселга келишига қарши норозилик намойиши бўлиб ўтди. Намойишга 9 мингга яқин киши чиққан, деб маълум қилинди Брюссель ҳуқуқ-тартибот идораларида. 

NBC телеканалининг маълум қилишича, намойишларда сўл ташкилотлар, касаба уюшмалари вакиллари ва экология соҳасидаги фаоллар иштирок этишган. Акция иштирокчилари Трамп сиёсатига қарши чиқишган. Хусусан, Трампнинг глобал исишга қарши курашиш дастурларини ёпиш қарори ва НАТОнинг барча давлатлари учун мудофаа харажатларини кўпайтириш зарурлиги борасидаги гаплари танқид остига олинган. Намойиш ташкилотчиларидан бири "Европа тинчликка пул сарфлаши лозим бўлган бир пайтда, Трамп унинг урушга кўпроқ пул сарфлашини истамоқда", деб айтди.   

Трамп 24 май куни Бельгияга етиб келди. У Бельгиядан "катта еттилик" етакчилари саммитида иштирок этиш учун Сицилияга жўнаб кетади.