Грециянинг собиқ бош вазири Лукас Пападимоснинг машинаси Афинада портлади. Бу ҳақда Афина ахборот агентлиги маълум қилди. 

Портлаш Афина марказидаги Марни ва 3-сентябрь кўчалари кесишмасида юз берган. Маълум қилинишича, портлаш оқибатида Пападимос ва унинг ҳайдовчиси ярадор бўлганлар.

"Жаноб Пападимос ва унинг ҳайдовчиси шифохонага етказилган", деб маълум қилинган полицияда.  

Reuters ахборот агентлиги маълумотларига кўра, машинада конвертга яширилган портловчи қурилма портлаган. Воқеа жойига полиция ва ўт ўчирувчилар етиб келишган.  

Таъкидланишича, айни вақтда собиқ бош вазир Эвангелизмос шифохонасида бўлиб, унинг ошқозон соҳасида жарроҳлик ўтказилмоқда. Шунингдек, у оёғидан жароҳат олган. 

Пападимос 2011 йил ноябрда ўшандаги бош вазир Георгиос Папандреу молиявий ва сиёсий инқироз вазиятида истеъфога кетгандан кейин Грециянинг техник ҳукуматини бошқарган. У бу лавозимни 2012 йил май ойигача эгаллаган.

Ҳозирда 69 ёшда бўлган Пападимос ўз вақтида Греция банки директори ва Европа Марказий банки вице-президенти лавозимларини эгаллаган.