Лола Каримова-Тилляева Ислом Каримов номи берилган Москва марказидаги хиёбон ва ҳайкалнинг лойиҳасини Москва шаҳар бошқарув органларига тақдим этиш мақсадида Россия пойтахтига ташриф буюрди. Бу ҳақда у Инстаграмдаги ўз саҳифасида маълум қилган.

“Бу лойиҳа устида иш олиб бориш биз учун жуда катта шараф ва масъулиятдир. Мазкур хиёбон шаҳарнинг чиройли жойларидан бири бўлиб қолишини истаймиз”, деб ёзади у. 

Маълумотларга кўра, мазкур лойиҳа устида Лондондаги "Британия учун жанг" монументал иншооти, Қиролича-она ҳайкали ҳамда Лондоннинг Сент-Панкрас станциясидаги "Учрашув жойи" бронза ҳайкалини ишлаган англиялик машҳур ҳайкалтарош Пол Дэйни ишлайди. Унинг сўнгги санъат асари "Ироқ ва Афғонистондаги урушлар" мемориал ёдгорлиги 2017 йилнинг март ойида Буюк Британия Қироличаси Елизавета II томонидан тантанали очиб берилган эди. 

“Москва шаҳридаги лойиҳа устида ишлар эканмиз, ушбу хиёбон кўп йиллардан кейин ҳам москваликлар ва туристлар учун ўз жозибасини сақлаб қолишига алоҳида урғу бердик. Биз лойиҳамиз тафсилотлари ҳақида вақтинча батафсил маълумот бермаяпмиз, сабаби, 2018 йилда лойиҳамиз амалга ошганидан кейингина, уни кенг омма эътиборига ҳавола этмоқчимиз.

Мазкур лойиҳада иштирок этаётган барча инсонларга ўз миннатдорчилигимни изҳор этаман”, деб ёзади Лола Каримова-Тилляева.

Суратда: Лола Каримова-Тилляева, Татьяна Каримова, ҳайкалтарош Пол Дэй ҳамда Ислом Каримов номидаги Фонд томонидан ташкил этилган ишчи гуруҳнинг бошқа аъзолари Москва шаҳрининг масъул шахслари билан учрашувда.