Тошкент шаҳрида туғилган Нурали Ҳошимов (исм-фамилиялар ўзгартирилган) ҳали 18 ёшга тўлмасидан судланишга улгурди. Ўшанда жарима жазосига ҳукм қилинган Нурали орадан бир йил ўтиб, яна жиноятга қўл урди. Бу сафар унга 10 йил муддатга озодликдан маҳрум қилиш жазоси тайинланди. Жазонинг ярмини ўтаганидан кейин эса инсонпарварлик тамойилларига асосан суднинг ажрими билан жазонинг ўталмай қолган қисми иш ҳақининг 20 фоизини давлат даромади ҳисобига ушлаб қолган ҳолда ахлоқ тузатиш ишлари жазосига алмаштирилди, деб ёзади “Ҳуқуқ” газетаси.

Афсуски, у булардан ўзига тегишли хулоса чиқармади. Кўчада айланиб юрар экан, ногоҳ анҳор ёқасида ноутбук компьютерида ишлаб ўтирган йигит билан қизни кўриб қолди. Муқаддам икки марта судлангани-ю, айни пайтда ахлоқ тузатиш ишлари жазосини ўтаётгани ҳам кўзига кўринмай, эс-хаёлини компьютерни улардан зўрлик билан бўлса-да олиб қўйиб, пуллаш эгаллади. Шу сабабли кўп ўйлаб ўтирмай, чўнтагидан ўйинчоқ тўппонча чиқарди ва уларга яқинлашиб, тўппончани қизнинг пешонасига тиради.

-  Тез турларинг! – деди таҳдид билан.

Диплом ишига тайёрланиб ўтирган ёшлар қўлида тўппонча ушлаганча тепаларида пайдо бўлган кимсани кўриб, қўрқиб кетишди. Унга жавоб беришга ҳам улгурмай, зўравон компьютер билан уяли телефонларни беришни талаб қилди. Кейин эса тўсатдан ноутбук билан телефонларига чанг солди. У буюмларни чангаллаганча қочишга тушди. Йигит уни қувишга киришди. Буни кўрган Нурали шошганидан ноутбукни қўлидан тушириб юборди. Таъқибчи ноутбук билан овора бўлганидан фойдаланиб, зум ўтмай кўздан ғойиб бўлди.

Орадан тахминан бир ой ўтганидан кейин Нурали Зангиота туманидаги танишларидан бирининг уйида ишлай бошлади. Шундай кунларнинг бирида кечки пайт кўчага чиқиб, шу маҳаллалик бир йигит билан гап талашиб қолди. Гап талашиш муштлашувга айланди-ю, Нурали ёнидан пичоқ чиқариб, уларни ажратишга чоғланган бошқа бир йигитнинг қорнига санчиб олди. Шундагина нима қилиб қўйганини тушуниб, бу ердан жуфтакни ростлади.

Аммо қонундан қочиб бўлмайди. Жиноят ишлари бўйича Шайхонтоҳур туман суди Нурали Ҳошимовга тайинланган жазонинг ўталмай қолган қисмини қўшиш йўли билан бу сафар 10 йил-у 6 ой муддатга озодликдан маҳрум этиш жазосини тайинлади.