Туркия Россия буғдойи импортига, шунингдек кунгабоқар ёғини божхона тўловларисиз етказилишига нисбатан янги чекловларни киритди. Бу ҳақида РИА "Новости" хабар берди

Россия қишлоқ хўжалиги соҳаси вакилларининг сўзларига кўра, мазкур чекловлар ҳақида ҳозирча расман маълум қилинмаган. Турк экспортчиларининг айтишича, ушбу ташаббус мамлакатнинг иқтисодиёт вазирлигига эмас, уларнинг ўзига тегишли. Улар вазият ўзгариши мумкинлигига ҳам ишора қилишган.

Чекловларга доир маълумот яқиндагина икки мамлакатнинг "ўзаро савдо-сотиқ соҳасидаги чекловларни бекор қилиш комплекс қарори"га оид келишув фонида пайдо бўлган. РФ президенти матбуот котиби Дмитрий Песков Москва ва Анқара савдодаги чекловларни бекор қилиш бўйича музокаралар давом эттирилаётгани, кунгабоқар ёғига доир чекловлардан хабари йўқлигини айтган.

22 май, душанба куни Россия ва Туркия Истанбулда савдодаги чекловларни бекор қилишга доир ҳужжатларни имзолашганди. Шундай бўлса-да, РФ бош вазири Дмитрий Медведев Туркия помидорига нисбатан қўйилган чекловлар ўз кучини сақлаб қолишини айтган эди.