25 май, пайшанба куни Тошкент шаҳрида Ўзбекистон ва Туркия ўртасидаги савдо-иқтисодий ҳамкорлик бўйича IV Ҳукуматлараро комиссия йиғилиши бўлиб ўтди. Йиғилиш Ўзбекистон Республикаси бош вазир ўринбосари Рустам Азимов ва Туркия бош вазир ўринбосари Йилдирим Туғрул Туркеш раислиги остида ўтказилди.

Йиғилиш давомида икки мамлакат вакиллари бугунга қадар эришилган ютуқлар ва истиқболдаги режалар ҳақида сўзлашди. 

Ўзбекистон Республикаси бош вазир ўринбосари Рустам Азимов Туркиянинг бир қатор компаниялари билан ҳамкорликда амалга ошириладиган лойиҳалар ҳақида батафсил тўхталиб ўтди.

Маълум бўлишича, Туркиянинг “Бадемли Фидан”, “Шахсер”, “Роял Агро”, “Асья Модерн” компаниялари билан биргаликда Бухоро, Навоий, Хоразм, Қашқадарё, Сурхондарё вилоятларида ва Қорақалпоғистон Республикасида интенсив боғларни яратишда ҳамкорлик қилиш мақсад қилинган. 

Бундан ташқари, мазкур форум доирасида қуйидаги қўшма лойиҳаларни амалга ошириш режалаштирилган: 

•   “Эмсас” компанияси билан Самарқанд вилоятида жойлашган “Афросиёб” ва Бухоро вилоятида жойлашган “Бухоро палас” мехмонхона комплексларини қайта таъмирлаш;
•  “ Фриго” компанияси билан биргаликда “Ангрен” махсус иқтисодий ҳудудда логистика марказлари учун совутиш ускуналарини ишлаб чиқариш ;
•  “Бигтэм Макине” компанияси билан биргаликда мева-сабзовот маҳсулотларини қайта ишловчи ускуналарни ишлаб чиқариш;
•  «Дал Текник» компанияси билан замонавий қурилиш молларини ишлаб чиқариш бўйича лойиҳалар амалга ошириш; 
•  “Йилдирим Ҳолдинг” билан кимё саноати маҳсулотларини, “Ренессанс Хеви Индастриз” компанияси билан қурилиш молларини, “Тантекс Боя” ва “Эрўғли Ҳолдинг” компаниялари билан текстил маҳсулотларини, “КОЧ” холдинг компанияси билан маиший электротехника маҳсулотларини ишлаб чиқариш ва бошқа лойиҳалар амалга оширилади.