Тошкент шаҳрининг 36та ўрта таълим мактабларида кундузги дам олиш масканлари ташкил этилади. Шу муносабат билан, ёзги дам олиш мавсумида ёшлар ва болалар иштирокидаги йўл-транспорт ҳодисаларининг олдини олиш мақсадида мазкур масканларга Тошкент ИИББ ЙҲХБ ходимлари бириктирилган бўлиб, улар йўл ҳаракатлари қоидаларига риоя этиш қанчалик зарур эканлиги борасида тарғибот ишларини давом эттиришади. Бу ҳақда Тошкент шаҳар ЙҲХБ жамоатчилик ва ОАВ билан алоқалар бўлими бошлиғи майор Алишер Абдуқодиров маълум қилди. 

Фото: майор Алишер Абдуқодиров

Бундан ташқари, 1 июнь – Халқаро болаларни ҳимоя қилиш кунида, режага мувофиқ, Тошкент шаҳри кўчаларида “Тарғибот автокарвони” тадбири ўтказилади. У шаҳар йўллари ва кўчаларида айланиб, одамлар гавжум бўладиган бозор, бекатлар, маданий-истироҳат боғларида патрул машиналарининг овозкучайтиргичлари орқали йўл ҳаракатлари қоидаларига риоя қилиш ишлари тарғибот қилинади. 

Унда фуқаролар ёзги мавсумда болаларни турли ЙТҲлар эҳтимолидан муҳофаза қилиш масаласига эътибор қаратилади.