2017 йил 25 май куни Тошкент шаҳрида бўлиб ўтган Ўзбекистон ва Туркия ўртасидаги савдо-иқтисодий ҳамкорлик бўйича IV Ҳукуматлараро комиссия йиғилиши якунида 2 млрд доллардан ортиқ қийматдаги лойиҳаларни амалга ошириш бўйича битим имзоланди. Бу ҳақида “Кун” мухбири хабар қилади.

Маълумки, савдо-иқтисодий алоқаларни ривожланишига бевосита таъсир этувчи омиллардан бири бу транспорт ва транспорт коммуникациялари соҳасидир. Бугунги кунда икки мамлакатни боғлаб турувчи ҳудудлараро транспорт-коммуникацион тизимисиз савдо алоқалар ривожланишини тасаввур этиш жуда қийин.

Йиғилишда Ўзбекистон Республикаси Ташқи савдо вазири Элёр Ғаниев икки давлатни боғлайдиган тўғридан-тўғри транспорт коридорини яратиш муҳим стратегик аҳамиятга эга эканлигини қайд этди.

“Биз «Боку-Ахалкалаки-Карс» темир йўл коридори тез кунда ишга тушишидан манфаатдормиз. Ушбу темир йўли нафақат Ўзбекистон ва Туркия ўртасида, балки Европа мамлакатлари билан ҳам самарали савдо алмашинувига ўз ҳиссасини қўшади”, - деди Элёр Ғаниев.

Туркия вакиллари эса, ўз навбатида, Ўзбекистон билан имтиёзли савдо қилиш бўйича битим имзолашни таклиф қилди.   

“Янги таҳрирдаги «Автомобиль транспортида халқаро юк ташиш» бўйича битим имзолашни қўллаб-қувватлаймиз. Битим мамлакатларимиз автоташувчиларига икки давлат ҳудуди орқали мунтазам юк ташишни эркин ҳолда амалга оширишига имконият беради. Бу эса, ўз навбатида, ўзаро товар айирбошлаш ҳажмига ижобий таъсир этади ва Ўзбекистон билан Туркиянинг мавжуд транзит салоҳиятини тўлиқ фойдаланишига имкон беради”, - деди Ўзбекистон Республикаси Ташқи савдо вазири ўз нутқида.