Дортмунднинг «Боруссия» клуби ҳужумчиси Пьер-Эмерик Обамеянг жамоани ўзгартириш ниятида.

Bild нашри маълумотига кўра, габонлик футболчи бу ҳақда «Боруссия» раҳбарияти билан гаплашди ҳамда унга бошқа клубга ўтишга рухсат беришларини сўради. Хабар қилинишича, Обамеянгга «Милан», «ПСЖ» ва Хитойнинг «Тяньцзинь Цюаньцзянь» жамоалари қизиқиш билдирмоқда.

Футболчининг немислар клуби билан амалдаги шартномаси 2020 йилнинг ёзига қадар мўлжалланган. У якунига етган мавсумда барча турнирлар доирасида 45 учрашувда майдонга тушиб, 39та гол урди ва 2та голли узатмага муаллифлик қилди. 2013 йилда «Сент-Этьен»дан «Боруссия»га ўтганидан бери эса у 119 марта рақиблар дарвозасини ишғол қилган.