Россия давлат Думаси жума якуни мамлакатга хорижлик ёки фуқаролиги бўлмаган шахс вақтинчалик яшашга рухсатнома олиш учун киришига янги виза турини жорий этадиган қонунни учинчи якуний ўқишда қабул қилди. 

Қонун РФ Конституциявий судининг 2016 йилнинг 16 февралдаги қарорини ижро этиш мақсадида ишлаб чиқилди. Унга кўра, Россияда вақтинчалик яшаш учун рухсат олган хорижлик ва фуқаролиги бўлмаган шахслар, РФга шахсни тасдиқловчи ҳужжатлар ҳамда вақтинчалик яшовчи шахс визаси асосида кириб келиши ва чиқиши назарда тутилган.

Қонун Россияга кириш учун оддий визалар рўйхатини янги виза билан тўлдиради – РФга вақтинчалик яшашга рухсат олиш мақсадида кириш учун. Бундай виза хорижлик ёки фуқаролиги бўлмаган шахсга Россия ИИВ ҳудудий органи унга мамлакатда вақтинчалик яшаш учун рухсат бериш ҳақида қарори бўлса, тўрт ойгача муддатга берилади.

Вақтинчалик яшовчи шахсга виза Россия ИИВ ҳудудий органи томонидан РФда вақтинчалик яшаш учун рухсат билан бирга берилади.

Бундан ташқари, қонунда “виза” тушунчасига “РФга кириш ва РФда бўлиш ёки РФ ҳудудидан транзит мақсадида фойдаланиш учун ваколатли давлат идораси томонидан берилган рухсат” деб аниқлик киритилган.