Италиянинг Сицилия оролида “Катта еттилик”нинг навбатдаги, ҳисоб бўйича 43-саммити ўз ишини бошлади. Саноат жиҳатидан энг ривожланган етти давлат – Буюк Британия, Германия, Италия, Канада, АҚШ, Франция ва Япония етакчилари учрашуви – Таормина шаҳрининг эрамиздан аввалги III асригача бўлган грек театри антик колонналари фонида умумий суратга тушиш билан очилди.  

Жума кунига режалаштирилган ялпи сессиялар ташқи сиёсат ва хавфсизлик муаммоларига бағишланади. Саммит кун тартибига Манчестердаги терактдан сўнг терроризм билан кураш масаласи киритилди, ҳамда, кеча учрашув мезбони – Италия бош вазири Паоло Жентилонининг маълум қилишича, якуний декларацияга терроризм ва экстремизмга қарши кураш бўйича чораларни кучайтириш ҳақида алоҳида қўшма баёнотни киритиш мўлжалланган.

Шунингдек, Жентилонининг таъкидлашича, “мунозаралар енгил бўлмайди”. Кузатувчиларнинг фикрича, кўпроқ эркин товар айирбошлаш ва иқлим ўзгариши каби масалаларда қарама-қаршиликлар бор. Маълумки, Америка президенти Дональд Трамп айнан шу мавзуларда шериклари позициясига қўшилаётгани йўқ.

“Еттилик” етакчиларининг мақсадларидан бири – Трампни иқлим ўзгариши бўйича Париж битимидан чиқмасликка кўндириш. Америка раҳбари эса саммитдан аввал, якуний қарорни Таорминадан сўнг қабул қилиши ҳақида айтиб ўтди.

Россия билан боғлиқ масала ҳам анча тушунарсиз. Экспертлар тахминига кўра, РФ билан муносабатлар албатта муҳокама қилинади, бунга халқаро барқарорликни таъминлаш нуқтаи назаридан ҳам ёндашилади. Италия бир неча бор РФ билан муносабатларни барқарорлаштириш ва йирик халқаро инқирозларни тартибга солишда тенг ҳуқуқли мулоқотни йўлга қўйиш устувор вазифалар эканини маълум қилганди.