Пекин G7 давлатлари саммити якуни бўйича қабул қилинган якуний декларацияни қоралади. Унда баҳсли ҳудудларни қуроллантириш сиёсати қораланган. Бу ҳақда Хитой ташқи ишлар вазирлигининг расмий вакили Лу Кан чиқиш қилди, деб хабар бермоқда  "Синьхуа" ахборот агентлиги. 

Дипломатнинг айтишича, "Катта еттилик" давлатлари халқаро ҳуқуқ баҳонасида минтақавий масалаларга аралашмоқда. "Пекиннинг бу масала бўйича позицияси аниқ ва изчилдир. Биз бевосита алоқадор томонлар билан музокаралар ўтказиш йўли билан Шарқий Хитой денгизи ва Жанубий Хитой денгизидаги баҳсларнинг тегишлича ҳал қилиниши, ҳамкорлик ва тинчликнинг мустаҳкамланиши тарафдоримиз", деб айтди Лу.  

Унинг таъкидлашича, Пекин G7 ва бошқа давлатларни вазиятни яхшилаб ўрганиб чиқишга, баҳслар бўйича бирор позицияни эгалламасликка ваъда бериш, минтақадаги давлатларнинг баҳсларни ҳал қилиш бўйича саъй-ҳаракатларини тўлиқ ҳурмат қилиш ва масъулиятсиз эътирозларни тўхтатишга чақирди.

Шарқий Хитой денгизида Хитой ва Япония ўртасида Сенкаку ороли бўйича ҳудудий баҳс мавжуд. Орол яқинида нефть захиралари топилган. Амалиётда бу оролни Япония назорат қилади, бироқ 1960-йиллар охиридан бу оролга Хитой ҳам даъвогар қилиб келади. Пекиннинг фикрича, ушбу архипелаг 14-асрда хитойликлар томондан очилган ва азалдан Хитой ери ҳисобланади. 

Жанубий Хитой денгизидаги баҳсли ҳудудларга эса Хитой, Тайвань, Малайзия, Филиппин, Бруней ва Вьетнам даъвогарлик қилади. Скарборо маржонқояси ва шельфида катта нефть ва газ захиралари борлиги тахмин қилинадиган Спратли жанубий архипелаги атрофидаги вазият айниқса кескин кўриниш олган.