Москва шаҳри ва Москва вилоятида 29 майда кузатилган довул оқибатида 11 киши ҳалок бўлган. Бу ҳақда "Интерфакс" ахборот агентлиги хабар бермоқда. Дастлаб 6 киши ҳалок бўлгани маълум қилинган. Одамлар устларига дарахтлар ва бошқа буюмлар қулаши оқибатида ҳалок бўлганлар. 

Маҳаллий вақт билан соат 15:00ларда тезлиги 22 м/c га етган шамол билан жала бошланган. Ижтимоий тармоқлар фойдаланувчилари шамол дарахтларни ва томлардаги ёпмаларни қўпориб ташлаётгани видеоларини жойлаштиришган. Россия Гидрометцентрининг прогнозига кўра, шундай об-ҳаво 30 май куни ҳам сақланиб қолади, 31 май куни ҳам жала ёғиши мумкин. 

Фото: ТАСС

Шунингдек, ҳаво ҳарорати 2 соат ичида 10 градусга тушиб кетган: довул бошлангунгача ҳаво ҳарорати 25,3 градус бўлган бўлса, 17:00 га келиб у 15 градусни ташкил қилган.  

Ўз навбатида Москва мэри Сергей Собянин довулдан кейин 40 дан кўпроқ одам тиббий ёрдам сўраб шифохоналарга мурожаат қилганини маълум қилган.

Фото: globallookpress.com

"Довул оқибатида ҳалок бўлганлар бор, 40 дан кўпроқ одам тиббий ёрдам сўраб мурожаат қилган. Ҳалок бўлганлар оилалари ва яқинларига ҳамдардлик билдираман", деб ёзган Собянин твиттерда.

Москва шаҳри ва Москва вилоятида шамол кучаётгани ва момақалдироқ яқинлашаётгани сабабли хавфлиликнинг "сариқ" даражаси эълон қилинган.

Таъкидланишича, кучли шамол Москва вилоятининг Шахов туманидаги туғуруқхонанинг томини учириб юборган. Шунингдек, кучли шамол Москва кўчаларидан биридаги автобус бекатини қўпориб ташлаган. Қўпорилган бекат бир одамни босиб қолган.