Android'нинг асосий ишлаб чиқарувчиларидан бири Энди Рубин The Verge нашрига ўзининг Essential компаниясининг биринчи смартфонини намойиш қилди. Шунингдек у уй ёрдамчиларига мўлжалланган Ambient OS тизими билан таништирди. 

Essential Phone 2560X1312 пикселли 5,7 дюймли экран билан таъминланган, у қурилманинг деярли бутун юза панелини эгаллаган. Юқори қисмида фронтал камера учун жой ажратилган. 

Қурилма Qualcomm 835 процессори асосида ишлайди. У 4 Гб оператив ва 128 Гб флеш-хотирага эга. Қулоқчинлар уланадиган 3,5 миллиметрли ўйма йўқ, қоронғуда олинган суратларни яхшилаш имконини берувчи иккиламчи камера мавжуд. Телефон корпуси зарар етишидан ҳимояланиш мақсадида титан ва сополдан ишланган.

Essential телефон билан бирга бир неча аксессуар ишлаб чиқаради. Магнит таянчли ва маълумотларни симсиз етказиш функциясига эга 360 даражали камера ҳамда зарядлаш ускунаси шулар жумласидиндир. Икки ускуна ҳам телефоннинг орқа қисмига маҳкамланади. 

Essential дастлаб АҚШда телефонлар сотувини йўлга қўймоқчи, ишлаб чиқаришнинг аниқ санаси ҳозирча маълум қилинмаган. Essential Phone нархи - 699 доллар.

Янги қурилмани савол бериш, экранга босиш ёки "нигоҳ" билан фаоллаштириш мумкин.