Flashpoint компанияси таҳлилчилари WannaCry вирусини қўллаган ҳолда уюштирилган киберҳужумга хитой тилида сўзлашувчилар алоқадор бўлиши мумкинлиги ҳақидаги хулосага келишди.  

Вирус билан зарарланган компьютерларда товон пули тўлаш ҳақида пайдо бўлган ёзувларни таҳлил қилган мутахассисларнинг фикрича, хабарлардан фақат инглиз ва хитой тилидагилари Google Translate таржимонисиз тузилган.  

Бу хабарларнинг муаллифи кўринишича инглиз тилини билади, бироқ у томондан йўл қўйилган хатолар инглиз тили унинг она тилиси эмаслигига ишора қилмоқда.

Шу билан бирга хитой тилидаги хабар тўғри тузилган ва бу ҳолат хабарнинг муаллифи хитой забонли эканлиги ёки унда яхши гаплашишидан дарак беради. 

Мутахассисларнинг таъкидлашича, хитой тилидаги хабарда "ҳафта" сўзининг шевадаги шакли учрайди. Ушбу шева Хитойнинг жанубида, Ҳонгконг, Тайвань ва Сингапурда қўлланади.  

Flashpoint таҳлилчиларининг аниқлашича, қолган 26 тилдаги хабарлар учун инглиз тилидаги матн асос қилиб олинган.

WannaCry товламачи-вируси қўлланган киберҳужум 12 майда содир этилган. Интерпол маълумотларига кўра, ҳужум оқибатида 150 та давлатда 200 мингдан кўпроқ компьютер зарарланган. Вирус компьютердаги барча файлларни шифрлаб, уларни яна аввалги ҳолатига қайтариш учун биткоинларда 300 долларга тенг пул тўлашни талаб қилган.   

Россиянинг "Лаборатория Касперского" компанияси мутахассислари вирусни Lazarus хакерлик гуруҳидаги шимолий кореялик хакерлар яратган бўлишлари мумкинлигини тахмин қилишган. 2016 йил февралида Бангладеш марказий банкидан 81 млн доллар ўғирланиши ушбу гуруҳ зиммасига юкланиб келади.