Андижонда тиллафуруш аёлни ниқобли йигитлар тунади

Жамият 31 Май 2017 8455
Фото: ЎзА

Балиқчи тумани Эски Ҳаққулобод қишлоғининг Янги Ҳаёт маҳалласида яшайдиган Фотима Абдуллаева (воқеа иштирокчиларининг исм-шарифлари ўзгартирилган) ярим кечаси аллақандай шовқиндан уйғониб кетди, деб ёзади “Постда” газетаси.

Ўрнидан турди-да, чироқни ёқиб, хавотир аралаш сўради:

-  Ким у?

Шу пайт рўпарасида юзига ниқоб таққан киши пайдо бўлиб, дўқ урди:

-  Ўчир овозингни! Йўқса ўзингни ҳам, болаларингни ҳам ўлдирамиз!

Аёл азбаройи қўрққанидан тиззалар дағ-дағ қалтираб, полга ўтириб қолди.

-  Гапир, пулларинг қаерда? – дағдаға билан сўради бошқа бир ниқоб таққан йигит.

Қаттиқ қўрққанидан Фотиманинг тили калимага келмасди. Босқинчилар уй бекасини ўрнидан турғазиб, стулга ўтқизиб, скотчлаб ташлашди.

-  Айт тезроқ! – дея иккинчи йигит мушт ўқталди.

-  Ҳеч қанақа пулим йўқ! Илтимос, мени қўйиб юборинглар! Ҳеч кимга чурқ этмайман.

-  Кимни лақиллатмоқчисан?! Бозорда тиллафурушлик қиласан-ку! Нега пулинг бўлмас экан?! Жонингдан умидинг бўлса, пулларингни қаерда сақлашингни айт!

Кўзларидан шашқатор ёш оқаётган жувон сервант томонга имо қилди. Зўравонларни сервантни титиб, 600 минг сўм пул, учта тилла узук ва бир дона тилла занжир топишди. Буям камлик қилгандек, аёлнинг қулоқларидаги зиракларни ҳам ечиб олишди. Уйда қўлга илингулик бошқа ҳеч нарса йўқлигига ишонч ҳосил қилишгач, кетишга чоғланишди. Кетиш олдидан уларнинг бири:

-  Агар бировга чурқ этсанг, қайтиб келиб ўлдирамиз. Болаларингни ҳам аяб ўтирмаймиз, - деб дағдаға қилди.

Уларнинг қораси ўчгач, Фотима бир амаллаб қўл-оёғини бўшатиб, дарҳол туман ИИБга қўнғироқ қилди.

... Шермуҳаммад билан Олимжон чойхонада улфатчилик қилиб ўтиришарди. Шермуҳаммад анчадан бери ҳеч қаерда ишламасди. Олимжон бўлса Андижон шаҳридаги новвойхоналардан бирида ишларди. Шунинг учун ёши каттароқ ошнасини ўз ҳисобидан меҳмон қилаётган эди.

-  Бир йўлини қилиб мўмай пул топиш керак, - дея гапни узоқдан бошлади Шермуҳаммад.

-  Мен эртадан кечгача тандир бошида куймаланиб арзимас пул топаман. Рўзғор тебратишимга етади-ю, лекин бугунгидек улфатчиликларни ўйлаб қоламан. 

-  Э, соддасан-да, ука, - улфатининг устидан кулди Шермуҳаммад. - Мен мўмай пул деганда бировнинг тўплаган пулини тортиб олишни айтаяпман. Сен бирор бадавлат хонадонни биласанми? 

-  Бир синфдошимнинг холаси бор. Бозорда тиллафурушлик қилади. Ҳойнаҳой, ўша аёлнинг пули кўп бўлса керак.

-  Қаерда яшайди?

-  Унинг уйини жуда яхши биламан. Бир неча марта жияни билан бирга борганман.

-  Яхши, эртага кечаси синфдошингнинг холасиникига “меҳмон”га борамиз. Розимисан?

-  Майли, - иккиланиброқ жавоб берди Олимжон. – Бу хавфли эмасми? Ахир, аёл мени танийдику...

-  Бу ёғидан хавотир олма. Юзимизга ниқоб тақамиз. Қарабсанки, сени ҳатто туққан онанг ҳам таний олмайди, - бепарво гапирди Шермуҳаммад.

Эртаси куни улар Эски Ҳаққулобод қишлоғида учрашишди. Дўкондан бир ўрам скотч ва иккита қишки тўқима қалпоқ сотиб олишди. Қалпоқлардан ниқоб ясашди. Ярим кечаси девор ошиб, Фотиманинг уйига бостириб киришди. Воқеанинг қолган тафсилотлари юқорида баён этилди.

Қўлга киритган ўлжаларни тенг бўлишиб олишди. Уй-уйларига тарқалишаётганда Олимжон сўраб қолди:

-  Ниқобни нима қилай?

-  Ҳар эҳтимолга қарши бир бурчакка яшириб қўй, ажабмас, кейинроқ яна керак бўлиб қолса, - деди айёрона кулимсираб Шермуҳаммад.

Андижон вилояти ИИБ ЖҚ ва ТҚКБ тезкор ходимлари Балиқчи туманида ИИБда ишлайдиган ҳамкасблари билан бирга бир сутка давомида гумон қилинувчиларни аниқлаб, қўлга олишди. Улфатларнинг уйидан Фотимага тегишли пуллар, заргарлик буюмларидан ташқари ниқоблар ҳам топилди. Шермуҳаммад ўшанда тўғри айтган экан. Ҳақиқатан ҳам ниқоблар яна керак бўлди. Фақат улфатларга эмас, изқуварларга. Нима учун дейсизми? Тунги босқинчиликни ким содир этганини исботлаш учун.

Кун янгиликлари
Фарғона вилояти ҳокими Сўх тумани, уй-жой муаммоси, табиий газ ва аҳолининг бошқа муаммолари ҳақида (видео)
20:30 / 21.08.2017 31699 Жамият
Artel Technical School «Келажак мактаби» ўқув нархларини пасайтирмоқда!
20:02 / 21.08.2017 17610 Жамият
Халқ таълими вазири билан очиқ суҳбат: янги вазирлик, 10-синф, пахта терими, коррупция ва йиғди-йиғдилар
23:29 / 20.08.2017 68522 Жамият
Ногиронлик ва мазлумлик исканжасида: бир аёл яхшилар саховатидан умидвор 
15:55 / 18.08.2017 58177 Жамият
Журналист ЎФФ матбуот хизматини ёлғончиликда айблади
12:21 2256 Спорт
Тошкентдаги Mobicon 2017’да Google, Яндекс, Одноклассники ва UFOX вакиллари чиқиш қилади
Электр энергиясининг намунали истеъмолчилари рағбатлантирилади
Трамп АҚШ ҳукуматини ёпиш билан таҳдид қилди
10:50 8713 Жаҳон
Самарқанд вилоятида 6 миллион доллар қийматидаги трансформаторлар ишга туширилди
Трамп: Ким Чен Ин АҚШни ҳурмат қилишни бошлади
10:30 9751 Жаҳон
Кўпроқ янгиликлар