Kobul markazida dahshatli portlash: qurbonlarning aniq hisobi yo‘q

Afg‘oniston poytaxti Kobul shahrida kuchli portlash ro‘y berdi. Kelib tushayotgan ma'lumotlarga ko‘ra, hodisa shaharning prezident saroyi va xorijiy elchixonalar binolari joylashgan hududdan uzoq bo‘lmagan joyda sodir bo‘lgan.

Portlash halokatli bo‘lgan - hodisa hududidan bir necha yuz metr masofadagi uylar shikastlangan.

Fox News telekanali afg‘onistonlik ma'murlarga asoslanib bergan ma'lumotiga ko‘ra, portlash kamida 50 kishini hayotdan olib ketgan.

Ariana News ma'lumotida qurbonlar soni 200 nafardan ortiq ekani aytilgan.

Afg‘oniston Sog‘liqni saqlash vazirligi ayni vaqtga kelib 60 kishi jarohatlangan holda shifoxonaga keltirilgani haqida xabar bergan.

Assoshieyted Press esa hodisa oqibatida "50 kishi yo jarohatlangani yo halok bo‘lgani" haqida yozmoqda.

Mahalliy politsiya terakt xudkush terrorchi tomonidan sodir etilganini ma'lum qildi.