Жанубий Кореяда собиқ давлат раҳбари Пак Кин Хенинг лавозимидан четлаштирилишига сабаб бўлган коррупция можароси бўйича тергов ишлари давом этмоқда.  Ушбу можаро сабабчисининг қизи Чон Ю Ра Сеулга учиб келаётган самолётда ҳибсга олинган, деб хабар қилмоқда Ёнхап агентлиги.

Жанубий Корея прокурорларининг ишонишларича, 21 ёшли қизни сўроқ қилиш унинг онаси, собиқ президент Пак Кин Хенинг яқин дугонаси Цой Сун Силь ташкил этган коррупция тармоғига ойдинлик киритишда ёрдам беради. Хусусан, прокуратуранинг жиддий тахминларига кўра, собиқ президентнинг сиёсий қўллаб-қувватловига эришган Samsung корпорацияси Цой Сун Силь компаниясига 18 миллион доллар маблағ ажратган. Бу эса Чон Ю Ранинг от спорти бўйича таҳсил олиши, ушбу спорт тури анжомлари ва отлар харид қилишга сарфланган. Бундан ташқари, Жанубий Кореядаги обрўли университетга киришида ҳам коррупция аралашганига доир эҳтимоллар мавжуд. 

Дания 2 январь куни Чон Ю Рани ўз ҳудудида ноқонуний бўлиб тургани учун ҳибсга олган эди. Дания ҳукумати Жанубий Корея прокуратураси сўровига кўра, Чон Ю Рани экстрадиция қилиш қарорини апрель ойида қабул қилди. 

Эслатиб ўтамиз, 2016 йил октябрь ойида Жанубий Кореяда йирик коррупция можароси авж олди. Ўшанда, маҳаллий матбуотда мамлакатдаги йирик корпорациялар, хусусан, Samsung Цой Сун Силь ташкил этган фондларга йирик пул ўтказмалари эвазига ҳукуматнинг қўллаб-қувватлашига эришгани тўғрисида хабарлар пайдо бўлган эди. Цой Сун Силь давлат лавозимига эга бўлмаса-да, президент маъмурияти ишларига аралашган ва президент билан дугоналигидан ўз манфаатлари йўлида фойдаланган.

Умуман, ушбу иш бўйича 30 кишига айблов илгари сурилди. Улар орасида Samsung вице-президенти Ли Чжэ Ён ҳам бор. Пак Кин Хе эса 10 март куни Конституциявий суд томонидан давлат бошқарувидан четлаштирилди. 9 май куни бўлиб ўтган навбатдан ташқари президентлик сайловида Мун Чжэ Ин давлат раҳбарлигига сайланди.