Афғонистон президенти Ашраф Ғани Кобулда 31 май куни содир этилган ва 90 кишини ҳаётдан олиб кетган терактдан сўнг «Толибон» ва «Ҳаққоний тармоғи» ҳаракатлари вакиллари бўлган 11 жангарини қатл этишга фармон берди ва ҳукм ижро этилди. Бу ҳақда Tolo News хабар тарқатди.

Маълум қилинишича, давлат раҳбари фармони билан қатл этилган жангарилар орасида дала қўмондонлари ҳам бор. Лекин ўлимга ҳукм қилинганлар орасида «Ҳаққоний тармоғи» раҳбари Жалолиддин Ҳаққонийнинг ўғли Анас Ҳаққоний ҳамда укаси Сирожиддин Ҳаққоний номлари йўқ.

Бундан ташқари, ҳукумат кучлари мамлакат шарқида 6 нафар худкуш-террорчини қўлга олган. Бу жангарилар «Ҳаққоний тармоғи» аъзолари экани айтилган.

31 май кунининг биринчи ярмида Кобул шаҳрининг хорижий элчихоналар жойлашган туманида бомбалар ўрнатилган автоцистерна портлатилди. Натижада 90 киши ҳалок бўлиб, 380 киши жароҳатланди. Портлаш учун жавобгарликни ИШИД ўз зиммасига олганди, аммо Афғонистон ушбу теракт «Ҳаққоний тармоғи» томонидан содир этилгани ҳақида маълум қилди.

«Ҳаққоний тармоғи» Покистоннинг Шимолий Вазиристон вилояти ҳудудида ҳаракатланади ва Афғонистон ҳукуматига қарши курашади.