Daimler AG концерни ва унинг хитойлик ҳамкори BAIC компанияси Хитойдаги қўшма корхонани кенгайтириш ҳақида келишиб олдилар. Beijing Benz Automotive Co., Ltd. деб аталувчи заводда электромобиллар ишлаб чиқарилади.

Бундан ташқари, ҳамкорликни кенгайтириш доирасида Daimler AG BAIC’нинг бўлинмаларидан бири – Beijing Electric Vehicle Co., Ltd.’нинг миноритар акциядорига айланади. Бу фирма электромобиллар ва уларга батареялар ишлаб чиқариш билан шуғулланади.

Келишувнинг молиявий томони ва "Даймлер" оладиган акциялар пакети ошкор қилинмаган.

Daimler AG концерни BAIC’нинг эгаларидан бири ҳисобланади. 2013 йилда немис компанияси Хитой компаниясининг 12 фоизлик акциялар пакетини сотиб олган. Битимнинг қиймати 625 млн долларни ташкил қилган. Шу билан бирга немислар BAIC директорлар кенгашида иккита ўрин олишган ҳамда Хитойда "Мерседес"ларни сотиш билан шуғулланувчи Beijing Mercedes-Benz Sales Service Co. компанияси устидан назоратни қўлга киритишган. 

Аввалроқ маълум қилингандек, 2019 йилда Mercedes-Benz Tesla Model X.билан рақобатлашадиган серияли электрик кроссовер ишлаб чиқармоқчи. Бу моделнинг концептуал кўриниши – прототип Generation EQ 2016 йил сентябрда Париждаги автосалонда илк бор намойиш қилинган.